VOV4.Jarai-Mơguah lơ 6/7, ră ruai hăng ƀing čih tơlơi pơhing phrâo, khua mua pơ ala wai lăng boh tŭ yua, Ding jum Pơtô hăng Pơjuăt brơi thâo, yap truh 4 mông 30 mơnit tlam lơ 5/7/2021, đơ đam dêh čar ta gơmâo 11 rơbâo 551 čô ƀơi 39 boh tơring čar, ƀôn prong khom pơplông tal 2 abih 12 gưl dêh čar yua klin Covid 19, amăng anun lu hloh ƀơi 2 boh tơring čar Bình Định 2.569 čô hăng Bắc Giang 2.477 čô.

Tui hăng akŏ bruă mơ̆ng Ding jum Pơtô hăng Pơjuăt, hơdôm čơđai aka pơplông anai, amra pơplông tal 2, hrơi blan pơplông yua kơ Ding jum Pơtô hăng Pơjuăt pơsit, tui hluai tơlơi gêh gal hŭi klin kheng.

Hơdôm anih huăi bơbeč yua kơ klin Covid 19 amra pơplông tal 1 mơ̆ng lơ 7/7 truh lơ 8/7. Hrom hăng anun, Ding jum Pơtô hăng pơjuăt ăt brơi thâo, amra čih anăn mut hrăm gưl prong sa tal đôč tơdơi dua tal pơplông abih anih 12 pơđut hĭ, kiăng pơgang boh tŭ yua bơkơnar kơ ƀing pơplông. Yua kơ anun, ƀing pơplông tal 2 huăi bơngơ̆t ôh kơ anŏ gêh gal mut hrăm sang hră gưl prong.

Nay Jek: Pơblang