VOV4.Jarai - Mơmŏt lơ 7/1, ƀơi plơi prong Vĩnh Long, tơring čar Vĩnh Long, Khul mơnuih ngă hmua Việt Nam, Ding jum ngă hmua hăng pơđĭ kyar ƀon lan tơring čar Vĩnh Long gum hrŏm pơphun Festival braih Việt Nam tal V thun 2021 hơmâo hơdôm rơtuh anih sĭ gơnam hăng lu gơnam hiam hơdjă. Đĭ pơhiăp amăng mông pơphun, ơi Lương Quốc Đoàn, Ding kơna Khul apăn bruă Ping gah, Khua Khul mơnuih ngă hmua Việt Nam brơi thâo, tơdơi kơ rơbêh 35 thun ngă tui hơdră pơplih phrâo, biă mă ñu lĕ tơdơi kơ 13 thun ngă tui tơlơi pơsit mrô 26 mơng Jơnum tal 7, Khul apăn bruă Ping gah tal X kơ ngă hmua, mơnuih ngă hmua, ƀon lan, gơnong bruă ngă hmua hăng bơwih ƀong huă dêh čar dưi ngă lu tơlơi.

Festival lĕ hrơi mông kiăng kơ hơdôm anom bơwih ƀong sĭ mơdrô dưi pơbưp nao rao lăi pơthâo gơnam tam mơng ƀing gơñu, ĕp anom bruă ngă hrŏm, pơđĭ kyar gơnong bruă pơkra pơjing gơnam ƀơi ƀon lan hăng kual ia lŏn dăo Cửu Long; djru hơdôm anom bơwih ƀong sĭ mơdrô, mơnuih ngă hmua mă bruă tŭ yua hăng djru gơnong bruă braih pơdai Việt Nam kah hăng hơdôm anih anom sĭ mơdrô gơnam đang hmua dưi bơkơtưn amăng jar kmar.

Siu Đoan: Pơblang