VOV4.Jarai - Git gai mông jơnum Khul git gai dêh čar pơgang klin Covid-19 pơphun tlam tom brơi lơ 21/5, ƀơi sang bruă Kơnuk kơna, Kơ-iăng khua dêh čar ơi Vũ Đức Đam, Khua git gai bruă čar kiăng tơring čar Bắc Giang wai lăng kơjăp hloh mrô mơnuih ngă bruă amăng anih dŏ pơčlah mơnuih mơnam, đah mơng plai ƀiă hơmâo klin ƀă hyu gah rơngiao. Tơring čar Bắc Giang ăt jing anih hơmâo klin kơtang hloh ră anai mơn. Ră anai hơmâo rơbêh 12.000 čô mơnuih mă bruă mơng tơring čar pơkŏn glăk dŏ glăi ƀơi anih dŏ pơčlah mơnuih mơnam ƀơi Bắc Giang. Tơring čar hơmâo akŏ pơdong Grup djru ba tơlơi hơdip kơ ƀing kông ñơn anai. Bruă lăp đing nao ră anai lĕ ngă hiư̆m pă kiăng djru ba hơdôm anom bơwih ƀong pơkra gơnam brơi Grup bơwih ƀong prong kah hăng Sam Sung tañ pơwơ̆t glăi pơkra gơnam tơdơi kơ sui hrơi pơdơi bruă pioh pơgang klin. Kơ-iăng khua dêh čar pơtă kơ hơdôm boh tơring čar, ƀon prong wai lăng klă anih phrâo hơmâo klin, hăng ƀing kông ñơn glăi mơng anih hơmâo klin.

Siu H’Mai: Pơblang