VOV4.Jarai - Pơ ala kơ Ding jum kơđi čar, Khua git gai Ping gah ơi Nguyễn Phú Trọng hơmâo  kĭ Tơlơi pơtrun mrô 02 mơng Ding jum kơđi čar kơ pơplih anih ngă bruă, hơdră ngă bruă mơng Khul mơnuih mut phung Việt Nam amăng rơnuk phrâo. Hăng tơlơi kiăng ngă lĕ pơjing Khul mut phung Việt Nam kơjăp kơtang amăng abih bang bruă, dưi găn rơgao tơlơi lông hăng pơsir djŏp bruă kiăng, ngă bruă klă amăng tơlơi pơplih phrâo ră anai; jing anom bruă kơđi čar - mơnuih mơnam hơđong kơjăp mơng Ping gah, Kơnuk kơna; jing anih pơtruh nao rai jê̆ giăm mơng Ping gah, Kơnuk kơna hăng ƀing kông ñơn, mơnuih mă bruă; djơ̆ hăng anom bruă pơ ala brơi prong hloh, gum pơgôp, pơlir hơbit ƀing kông ñơn hăng mơnuih mă bruă amăng dêh čar ta; gum akŏ pơjing grup kông ñơn Việt Nam thâo rơgơi, kơjăp kơtang, jing mơnuih nao hlâo amăng bruă pơđĭ kyar tañ hăng hơđong kơjăp mơng lŏn ia ta. Tơlơi pơtrun ba tơbiă hơdôm tơlơi kiăng ngă amăng thun 2025: Gir hơmâo 13 klăk 500 rơbâo čô mơnuih amăng khul, abih bang anom bơwih ƀong hơmâo mơng 25 čô kông ñơn, mơnuih mă bruă khŏm hơmâo khul mut phung; truh thun 2023 gir hơmâo 12 klăk čô mơnuih amăng khul. Truh thun 2030 hơmâo 16 klăk 500 rơbâo čô mơnuih mut phung...Gir hơmâo 85% truh kơ lu hloh hơdôm anom bơwih ƀong, khul grup hơmâo kĭ pơkôl tơlơi ngă bruă hrŏm. Truh thun 2045: Abih bang mơnuih mă bruă lĕ mơnuih hơmâo anăn amăng Khul mut phung Việt Nam; 99% anom bơwih ƀong, anom bruă hơmâo khul mut phung dưi kĭ hră pơkôl ngă bruă hrŏm.

Siu H’Mai: Pơblang