VOV4.Jarai-Ƀơi să Trung Lý, tơring glông Mường Lát, Thanh Hóa phrâo jơnum jao sang ngă gru hăng djru man pơdong sang kơ mơnuih ƀun rin, tơnap tap ƀu hơmâo sang dŏ. Anai lĕ hơdră yua kơ Ding jum kông an ngă hrom tơring čar Thanh Hóa laih anun sang bruă prăk pơcruh ngăn Ngoại thương Việt Nam Vietcombank djru “Man pơdong 600 boh sang kơ mơnuih ƀun rin ƀơi tơring glông Mường Lát”.

Tui hăng akŏ bruă, hơdră anai djru 30 klai prăk brơi tơring glông Mường Lát pioh pơdong 600 boh sang kơ mơnuih ƀun rin. Sa boh sang rơnoh prăk 50 klăk, ngă djơ̆ 3 tơhnal pơkă kjăp “Atur khăng, bơbung kjăp, pơnang kơtang” tui hăng Ding jum kông an pơkra hơbô̆.

Mường Lát tơring glông ƀun rin hloh tơring čar Thanh Hóa laih anun ăt jing sa amăng 56 boh tơring glông ƀun rin amăng dêh čar. Ƀuh tơlơi anun, Ding jum kông an git gai djop sang  bruă kơsem lăng pơkra hơbô̆ sang, djru kơ anom bruă kông an tơring čar Thanh Hóa pô gơgrong, ngă hrom hăng tơring glông Mường Lát man pơdong, pơhrêp pơkra glăi sang, djru ngă hơđong tơlơi hơdip mơda kơ mơnuih ƀôn sang ƀun rin.

Ră anai, man pơdong giong 9 boh sang ngă gru laih anun kơtưn truh abih blan 5/2021 amra ngă giong abih 600 boh sang khăp pap, jao kơ sang anŏ mơnuih ƀôn sang ƀun rin ƀơi Mường Lát.

Nay Jek : Pơblang