VOV4.Jarai-Anom bruă tơhan pơlih wai lăng plơi pla hăng rơnuk rơnua mơnuih mơnam, Ding jum kông an jơnum lăi pơthâo hơdră mă yua amăng komputer wai lăng mơnuih ƀôn sang kual hơmâo klin amăng đơ đam dêh čar, tui hăng mrô jŭ yap djă pioh anăn ană plơi amăng dêh čar. Tui hăng anun, Anom bruă tơhan pơlih wai lăng plơi pla hăng rơnuk rơnua mơnuih mơnam pok pơhai lông mă yua lăng bruă wai lăng mơnuih ƀôn sang kual hơmâo klin ƀơi Hà Nội hăng tơring čar Quảng Ninh tui hăng hơdră pơkĕ internet pơtruh anih djă pioh mrô rơnoh dêh čar wai lăng mơnuih ƀôn sang.

Ngă giong hơdră bơwih brơi mơnuih ƀôn sang čih anăn pơhaih pô gêh găl hloh, pơgang hơgŏm tơlơi pơhing rĭm mơnuih, kiăng djru kơ bruă hơduah ĕp pơhlôm, pơgang klin Covid ră anai. Trung tá, Nguyễn Thành Vĩnh, Kơ-iăng khua anom djă pioh rơnoh ƀơi dêh čar wai lăng gah  ană plơi pla brơi thâo, kơnang kơ hơdră boh thâo anai dưi wai lăng anăn mơnuih ƀôn sang amăng kual djơ̆ klin, mơnuih ƀôn sang mă yua hơdră anai amra tañ lăi pơthâo tơlơi pơhing drơi jăn gơñu pô tong ten, tơpă, thâo krăn tơlơi pơhing klin kheng amăng kual gơñu dŏ hơdip mơda, mă bruă, đah mơ̆ng ngă tui hơdră pơhlôm, pơgang klim hmao kru.

Pơhaih tơlơi pơhing, pơdưm gru kơnăl QRcode pioh pel ĕp kman klin sit găn rơgao pơ anih pơgăn jơlan, huăi rơngiă mông ngă hră pơar ngă kơđông jơlan; ƀing tơhan ngă bruă pơgăn jơlan, mă yua hơdră anai, tañ čih pơƀut anăn hăng wai lăng ană plơi pla kual hơmâo klin tañ hloh laih anun lăi pơthâo ĕp hơdră git gai pơhlôm, pơgang klin Covid 19.

Nay Jek: Pơblang