VOV4.Jarai - Mơguah lơ 21/6, Ping gah Kông ang dêh čar ta, Ding jum kông ang pơphun Jơnum klah čun bruă mă kông ang 6 blan akô̆ thun 2021. Tơlơi lăi pơthâo glăi amăng mông jơnum lăi rơđah: mơng akô̆ thun truh ră anai, khul Kông ang mơnuih ƀôn sang hmâo gir run hrưn đĭ, đing nao pok pơhai khop hơdôm jơlan hơdră, kơčăo bruă, jơlan gah pơsir bruă hmâo ba tơbiă ngă tui truh kih tơhnal pơkă, tơlơi kiăng mơng thun 2021.

Khua mir sir dêh čar ta ơi Nguyễn Xuân Phúc nao pơhmư̆ Jơnum klah čun bruă Kông ang 6 blan akô̆ thun

Pơhiăp amăng mông jơnum, Khua mir sir dêh čar ta ơi Nguyễn Xuân Phúc lăi rơđah: “Amăng tơlơi dleh tơnap mơng klin ruă, tơlơi kơdŏng phă khop mơng ƀing kơdŏng glăi kơnuk kơna, Ding jum kông ang hmâo gir run biă, gum hrom kơjăp hăng hơdôm khul kah hăng Khul ling tơhan, hơdôm gưl Ping gah gong gai plơi pla, Jơnum min djop djuai ania mơnuih mơnam dêh čar... kiăng đing nao iâu pơhrui khul mơnuih, pok pơhai hơdôm jơlan gah pơgang abih bang hơdôm tơlơi prong mơng lŏn ia. Rơđah biă ñu kah hăng Jơnum prong tal 13 mơng Ping gah, ruah khua pơ ala mơnuih ƀôn sang, ruah khua Khul pơ ala mơnuih ƀôn sang hơdôm gưl..., ngă giong truh kih hơdôm tơhnal pơkă, bruă ba tơbiă”./.

Siu H’ Prăk: Pô pơblang