VOV4.Jarai - Tlam mơmot lơ 12/7, ƀơi Hà Nội, Đại tướng Tô Lâm, Khua ding jum Tơhan Kông ang hơmâo jơnum lăng nao rai amăng tivi hăng ơi Ajit Kumar Doval, Khua djru bruă rơnuk rơnua dêh čar India. Ƀơi mông jơnum, dua bơnah kiăng pơtruh nao rai tơlơi pơhing, lăi pơthâo tơlơi pơtrun mơng khua mua, ngă hrŏm djru nao rai ƀơi mông jơnum jar kmar ăt kah hăng pơsir bruă mơ̆ dua bơnah đing nao. Pơhiăp ƀơi mông jơnum, Khua djru bruă rơnuk rơnua dêh čar India lêng lăng yôm hăng djă bong, pơđĭ kyar tơlơi gum pơgôp, ngă giăng mah kơplah wah dua boh dêh čar, amra pok prong tơlơi ngă hrŏm hăng Ding jum Kông ang Việt Nam ƀơi abih bang bruă. Dua bơnah pơphun tŭ yua mông Jơnum pơtom hiăp tơlơi rơnuk rơnua gưl Kơ-iăng khua ding jum tal dua ƀơi India; pơđĭ tui tơlơi ngă hrŏm pơgăn tơhan pirăt, ƀing ngă soh prong, mơnuih ngă soh gah boh thâo phrâo, rao prăk (prăk soh jing prăk djơ̆ phiăn), tơlơi soh gah ma túy; pơtrut bruă pơtô hrăm, pơtŏp brơi mơnuih apăn bruă gah boh thâo ia rơgơi, boh thâo kơđi prong.

Siu H’Mai: Pơblang