VOV4.Jarai - Tlam lơ 11/11, ƀơi Hà Nội, Ding jum ling tơhan pơphun Jơnum lăng nao rai mơng ataih pok pơhai kơ bruă pơgang klin Covid-19 pơ anăp anai. Khut khăt ngă tui tơlơi pơsit mrô 128 mơng Kơnuk kơna, pơ anăp anai sa amăng hơdôm boh tơhnal Ding jum ling tơhan git gai ngă tui “4 mơta ha anih” amăng pơgang klin Covid-19. laih dong prap lui bruă pơgang tơlơi truh sat mơng kơthel ia ling dăo. Thượng tướng Vũ Hải Sơn, Kơ-iăng Khua ding jum ling tơhan brơi thâo: Boh tơhnal yôm phun amăng pơgang klin pơ anăp anai lĕ đing nao pel ĕp akŏ bruă pơgang klin, pơtô pơhrua dong, pơpha mơnuih mă bruă, pơhrua gơnam tam, ia jrao, măi mok gah ia jrao, pơkra ming klă anih anom, gơnam măi mok ƀơi hơdôm anih pơčlah pơƀut; prap lui pok pơhai hơdôm bruă djru brơi hơdôm ƀon lan hơmâo tơhan wai lăng lơ̆m klin hơđuh đĭ dong. Laih dong rơkâo djop anom bruă git gai ling tơhan, puih tơhan, djop sang ia jrao mơng anai prap lui bruă akŏ pơjing grup nai ia jrao kiăng kơtưn klă bruă ƀơi hơdôm sang ia jrao să, phường lơ̆m hơmâo tơlơi kiăng.

Siu Đoan: Pơblang