VOV4.Jarai-Anom bruă ping gah gơnong dlông-Ding jum ling tơhan jơnum jak iâu bruă ngă yôm phara hăng akŏ ñu “Ling tơhan hrom hăng đơ đam dêh čar gum tơngan pran jua hrom bơkơtưn ngă bruă pơhlôm, pơgang kiăng dưi hĭ hăng klin prong Covid 19. Khua tơhan krên dên, ơi Phan Văn Giang, Khua ding jum ling tơhan git gai jơnum pơdah amăng tivi mơ̆ng anih phun ƀơi Sang bruă ding jum ling tơhan hrom hăng 220 boh anih lăng nao rai amăng tivi amăng đơ đam dêh čar.

Bruă ngă bơkơtưn nao rai yôm phara “Ling tơhan gum hrom pran jua hăng dêh čar bơkơtưn ngă bruă pơhlôm, pơgang khom dưi hĭ hăng klin prong Covid 19” pơtum nao kơ bruă ngă hrom, djru djop anom bruă ping gah, gong gai kơnuk kơna djop tơring čar pơsir tơlơi tơnap tap, djru mơnuih ƀôn sang hơpuă yuă pơdai kơtor, djru gơnam yua kiăng ječ bơwih brơi kơ tơlơi hơdip mơda mơnuih ƀôn sang laih anun pơgang tơlơi suaih pral kơ ană plơi pla; prăp lui hơdră pơhlôm, pơgang klin kơtang hloh, pơsir djop tơlơi truh ječ ameč kiăng huăi dŏ kơtuă.

Amăng hrơi blung a jak iâu, hơmâo 1096 čô khua mua, ling tơhan hrăm gah bruă ia jrao čih anăn rơkâo pơyơr pran jua nao mă bruă djru ƀôn prong Hồ Chí Minh hăng hơdôm tơring čar gah kual dơnung pơhlôm, pơgang klin Covid 19.

Nay Jek: Pơblang