VOV4.Jarai - Thượng tướng Hoàng Xuân Chiến, Kơ-iăng Khua ding jum ling tơhan phrâo jao brơi Khua sang anih jưh pơ ala dêh čar Lao ƀơi Việt Nam ơi Sengphet Houngboungnuang gơnam tam măi mok pioh pơgang klin hăng nua ñu rơbêh 5 klai 200 klăk prăk mơng Ding jum ling tơhan Việt Nam djru brơi Ding jum ling tơhan dêh čar Lao.

Thượng tướng Hoàng Xuân Chiến jao gơnam amra djru gah ia jrao brơi dêh čar Lao

Thượng tướng Hoàng Xuân Chiến brơi thâo Ding jum ling tơhan Việt Nam hơmâo git gai hơdôm Quân khu, Anom bruă git gai ling tơhan, Anom bruă git gai tơhan wai pơgang guai lŏn ia hơdôm tơring čar ha guai hăng dêh čar Lao tơdah dưi amra djru brơi dêh čar Lao tui tơlơi ƀing gơñu kiăng. Khua anih jưh ơi Sengphet Houngboungnuang lăi pơtong lơ̆m klin Covid-19 hơđuh đĭ ƀơi Lao, Việt Nam lĕ dêh čar blung a djru brơi dêh čar Lao gơnam tam măi mok hăng ƀing nai ia jrao amăng hrơi blan dêh čar Việt Nam ăt glăk pơgang klin mơn, amăng anun Ling tơhan Việt Nam hơmâo djru brơi ječ ameč hăng djop mơta.

Siu Đoan: Pơblang