VOV4.Jarai-Pơ anăp anai, klin kheng Covid 19 ăt tơnap đôč aka ƀu hơdư̆ ôh yua hơmâo kman djuai phrâo kơtang hloh, Ding jum Man pơhpô hăng tuh pơ alin him lăng dŏ lu tơlơi tơnap tap lông lăng hăng ƀing ngă bruă sĭ mơdrô pơkra ming gơnam sĭ mơdrô laih anun pơdah thâo 8 mơta hơdră, ngă pran kơtang rŭ glăi tơlơi bơwih ƀong huă mơ̆ng djop sang bruă ngă bruă sĭ mơdrô.

 Amăng anun ăt pơtong glăi tơlơi pơtô “Pơkơdong hăng klin kah hăng blah ayăt”, djop gưl sang bruă, djop tơring čar, plơi pla pơtum pran jua gir run lu hloh, gleng nao kơ bruă pơhlôm hăng pơgang klin Covid 19, ngă gêh găl kơ sang bruă pơkra ming gơnam sĭ mơdrô hơđong bruă mă sĭ mơdrô, rŭ glăi laih anun pơđĭ kyar.

Tui hăng anun, ngă rah bruă pơhlôm pơgang klin laih anun djă bong bruă mă pơkra ming gơnam sĭ mơdrô; pơhlôm hơđong bruă pơdŭ pơgiăng gơnam sĭ mơdrô tŭ yua; djru rơnoh prăk, pơsir tơlơi tơnap tap prăk kăk mă bruă kơ djop sang bruă bơwih ƀong sĭ mơdrô….Hrom hăng anun, Khua ding jum Man pơphô hăng tuh pơ alin, ơi Nguyễn Chí Dũng brơi thâo, Khua dêh čar tañ akŏ pơjing Grup mă bruă yôm phara mơ̆ng Khua dêh čar kiăng pơsir tơlơi tơnap tap kơ anom bruă bơwih ƀong sĭ mơdrô hăng mơnuih ƀôn sang bơbeč yua mơ̆ng klin prong Covid 19 ngă.

Nay Jek: Pơblang