VOV4.Jarai - Hră mơ-it ječ ameč kơ bruă kiăng djru brơi bruă mă yua prăk blơi pơdai braih, gơnam tam yua Khua ding jum wai lăng bruă pơkra gơnam sĭ mơdrô Nguyễn Hồng Diên kĭ amăng lơ 12/8/2021 lăi rơđah: Kiăng djru kơ ƀing hyu mơdrô, anom bơwih ƀong, mơnuih pơkra gơna, sĭ pơdai braih amăng hrơi glăk hơmâo klin Covid-19, Sang bruă prăk Việt Nam hơmâo laih hră rơkâo kơ hơdôm Sang bruă prăk sĭ mơdrô hăng Sang bruă prăk hơdôm boh tơring čar, ƀon prong kual lŏn dăo ia krông Cửu Long pơhlôm hơmâo prăk brơi čan pioh blơi pơdai, braih ƀơi kual anai hăng lu tơlơi ngă bruă phara.

Khă hnun, mơng bruă krăp lăng na nao anih sĭ mơdrô hăng bruă pơhiăp hăng Khul wai lăng pơdai braih Việt Nam hăng ƀing juăt mơdrô braih sĭ kơ tač rơngiao, bruă hơmâo prăk djru tui hră mrô 5747 aka ƀu gêh gal ôh. Kiăng ngă amuñ brơi hloh kơ hơdôm anom bơwih ƀong dưi hơmâo prăk blơi pơdai, braih mơng mơnuih ƀon sang, Ding jum wai lăng bruă pơkra gơnam sĭ mơdrô rơkâo Khua dêh čar jao kơ Sang bruă prăk Việt Nam sem lăng, git gai hơdôm Sang bruă prăk bơwih ƀong sĭ mơdrô hơmâo djru brơi kơmlai čan prăk aset ƀiă kơ hơdôm anom bơwih ƀong, djru brơi anom bơwih ƀong dưi gơgrong čan prăk hăng gơnam gơñu blơi.

Siu H’Mai: Pơblang