VOV4.Jarai - Mơng lơ 17/8 truh lơ 15/9/2021, Ding jum pôr pơhing pơphun jơlan hơdră “Pran khăp pap amăng hrơi hơmâo klin, thâo djru tơdruă” hăng rơnoh prăk truh pơ 160 klai prăk. Ding jum pôr pơhing hơmâo iâu pơthưr hăng git gai djop anom bơwih ƀong sĭ mơdrô anun lĕ VNPT, Vettel Telecom, T&T Group, Sang bruă prăk MBank, kông ti dăng kông Việt Nam, Viettel Post mut hrŏm amăng jơlan hơdră anai. Ƀing mơnuih amra djru lĕ ƀing mơnuih ƀun rin, sang anŏ tơnap tap, bơbeč nao kơtang mơng klin Covid-19, ƀing aka ƀu tŭ mă tơlơi gum djru mơng ƀôn prong Hồ Chí Minh. Hluai tui mrô čih anăn mơng Jơnum min djop djuai ania mơnuih mơnam Việt Nam ƀôn prong Hồ Chí Minh, kông ti dăng kông Việt Nam (Vietnam Post) hăng Viettel Post amra gum hrŏm hăng gong gai hăng hơdôm anom bruă bơdjơ̆ nao amăng ƀon lan kiăng kơ hyu ƀơk gơnam. Rĭm anung gơnam hơmâo gơnam ƀong huă anun lĕ 5 kĭ braih, ia mơmuă, sik, ngok hra, ia măm, plôi, hơbơi Mi, boh mơnŭ kiăng kơ pơhlôm brơi gơnam ƀong kơ mơnuih ƀon sang amăng ƀôn prong Hồ Chí Minh amăng hơdôm hrơi pơgang klin.

Siu Đoan: Pơblang