VOV4.Jarai - Ding jum pơtô hrăm phrâo hơmâo hră pơ-ar mơ-it Khua jơnum min mơnuih ƀon sang hơdôm tơring čar, ƀôn prong kơ bruă čơkă mă, ngă gêh gal brơi ƀing čơđai dưi hrăm hră ƀơi hơdôm kual hơmâo klin Covid-19. Tui hăng Ding jum pơtô hrăm, ƀơi anăp kơ tơlơi tơnap tap mơng klin Covid-19, lu čơđai pơplih anih dŏ hơdip mơ̆ aka ƀu dưi glăi pơ plơi pla kiăng pot glăi sang hră lơ̆m pơphun thun hrăm phrâo. Kiăng kơ pơhlôm tơlơi dưi mơng ƀing čơđai sang hră, Ding jum pơtô hrăm rơkâo Khua jơnum min mơnuih ƀon sang djop tơring čar, ƀôn prong git gai gơnong bruă pơtô hrăm, djop sang hră ngă tui hơdră čơkă mă, ngă gêh gal brơi ƀing čơđai dưi hrăm hră ƀơi hơdôm anih dŏ hơdip jang jai amăng hrơi blan pơčlah pơgang klin Covid-19, lăp djơ̆ hăng tơlơi sit nik amăng ƀon lan, sang hră; gum hrŏm hăng gong gai ƀon lan, sang hră ƀơi hơdôm anih ƀing čơđai glăk hơdip jai jai brơi čơđai nao hrăm hră djơ̆ anih hrăm.

Siu Đoan: Pơblang