VOV4.Jarai - Mơng lơ 27/4 ƀing čơđai amăng đơ đam dêh čar ta pơphun nô̆p hră pơ-ar pơplông mă ƀăng hrăm hră hăng ruah čơđai đĭ hrăm gưl dlông, cao đẳng thun 2021. Kiăng gal brơi kơ čơđai sang hră, Ding jum pơtô pơhrăm dêh čar ta lăi pơthâo pok glông djru lăi pơhing tal pơplông mă ƀăng gưl 3 tui email hăng telephone amăng hơdôm tal čơđai ngă hră pơplông, ruah čơđai. Kiăo tui anun, kiăng dưi djru lăi pơhing kơ tal pơplông mă ƀăng gưl 3, čơđai sang hră hăng amĭ ama čơđai amra mơ-ĭt email truh anih anom hotrothi2021@moet.gov.vn amăng hơdôm hrơi mơng lơ 27/4 truh lơ 20/8 ƀudah djru tui jơlan mrô telephone amăng hơdôm mông mă bruă čar tui mrô 024.32181386. Ding jum pơtô pơhrăm dêh čar ta pơtă hơdôm bôh sang hră gưl dlông, cao đẳng pơdong anom bruă kiăng lăi pơblang tơlơi tơña bơdjơ̆ nao bruă ruah čơđai mơng sang hră hăng hơdră gum djru amăng ruah čơđai; hrom hăng anun, lăi pơthâo mrô telephone, email kiăng lăi pơthâo glăi amăng plăng pơhing điện tử mơng sang hră, măi mok pôr pơhing pơkon./.

Siu H’ Prăk: Pô pơblang