VOV4.Jarai - Amăng mông jơnum abih bang Jơnum min bơwih ƀong mơng Khua pơ ala mơnuih ƀôn sang lom lơ 24/6, Khua Ding jum prăk kak dêh čar ta Hồ Đức Phớc lăi rơđah, phrâo rơgao Jơnum min apăn bruă Khua pơ ala mơnuih ƀôn sang dêh čar ta hmâo tŭ ư pha brơi 14.000 klai prăk mơng ngăn drăp kơnuk kơna, hrom hăng prăk mơng Keh prăk Vaccine pơgang, pơgăn Covid-19 năng ai ñu 8.000 klai prăk, abih bang lĕ 22.000 klai prăk, giăm djop pioh tlâ̆o vaccine pơgang Covid-19 brơi 75 klăk čô mơnuih ƀôn sang, rim mơnuih 2 ară. Rơnuč blan 5, Jơnum min apăn bruă Khua pơ ala mơnuih ƀôn sang dêh čar ta pơsit mă yua 12.000 klai prăk pơkrem mă yua thun 2020 pioh blơi vaccine pơgang klin Covid-19. Hăng pơkă lăng hlâo blơi 150 klăk liều vaccine brơi năng ai ñu 75 klăk čô mơnuih, Ding jum prăk kak dêh čar ta him lăng kiăng hmâo năng ai ñu 25.200 klai prăk./.

Siu H’ Prăk: Pô pơblang