VOV4.Jarai - Tlam lơ 11/6, Ding jum prăk kăk hơmâo ngă lơphet tŭ mă prăk djru kơ Keh prăk vaccine pơgang Covid-19 mơng sa, dua khul grup, anom bruă, anom bơwih ƀong. Khua ding jum prăk kăk ơi Hồ Đức Phớc hơmâo nao lăng hăng brơi Hră pơsit kơ ƀing gum djru. Ƀơi mông ngă lơphet, Khua ding jum prăk kăk ơi Hồ Đức Phớc hăng khua Keh prăk hơmâo tŭ mă prăk gum djru mơng 5 anih hăng mrô prăk rơbêh 320 klai prăk. Pơ ala kơ ƀing khua mua, mơnuih mă bruă amăng Sang pioh prăk Kơnuk kơna, ơi Nguyễn Đức Chung, Khua Sang pioh prăk kơnuk kơna ăt hơmâo djru kơ Keh prăk lĕ 3 klai 450 klăk. Khua ding jum prăk kăk ơi Hồ Đức Phớc pơsit: amăng hrơi mông tơlơi bơwih ƀong sĭ mơdrô bưp lu tơlơi tơnap yua klin Covid-19 ngă, samơ̆ lu anom bơwih ƀong ăt gir pơkrem prăk, pơhlôm bruă mă laih dong djru kơ Keh prăk vaccine pơgang Covid-19 dong.

Siu H’Mai: pơblang