VOV4.Jarai-Mơguah lơ 14/10, Kơ-iăng Khua dêh čar ơi Vũ Đức Đam mă bruă hăng Ding jum Gru grua Boh thâo Pơrơguăt drơi jăn hăng Tuai čuă ngui laih anun Ding jum jơlan glông hăng pơdŭ pơgiăng kơ hơdră pơphun glăi bruă tuai čuă ngui pơ anăp anai. Dua mơta bruă bơkơtuai tong ten amăng mông jơnum lĕ pok tui ƀơƀrư̆ bruă tuai čuă ngui amăng dêh čar; lông ngă lăng sa dua anih čơkă tuai jar kmar.

Kơ-iăng khua dêh čar ơi Vũ Đức Đam pơhiăp amăng mông mă bruă

Kơ-iăng Khua dêh čar ơi Vũ Đức Đam pơtrun hiăp dua ding jum anai tañ hơmâo hơdră pơtô brơi, tơlơi pơtrun anŏ gêh găl ba tuai hyu ngui tui hăng tuôr, kiăng pok bruă čơkă tuai hyu ngui samơ̆ ăt khom bong glăi kjăp, djơ̆ hnong, beč bal, dưi pơgang klin. Ƀơi mông jơnum, Kơ-iăng khua dêh čar ơi Vũ Đức Đam lăi pơtong: Ding jum Gru grua Pơrơguăt drơi jăn hăng Tuai čuă ngui laih anun Ding jum Jơlan glông hăng pơdŭ pơgiăng tañ ngă hră pơtô brơi, pơkă tơlơi gêh găl ngă hrom čơkă tuai hyu ngui tui tuôr laih anun lơ̆m ba hyu tuai dưi nao rai hơđong, rơnuk rơnua. Boh nik ñu, djop tuor ba phung tuai hyu ngui lu mơnuih đĭ rơdêh treng hăng đĭ rơdêh por.

Nay Jek: Pơblang