VOV4.Jarai-Ƀơi Dak Lak bruă mă mơ̆ng khul ngă bruă bơkơnar đah rơkơi đah kơmơi kiăng djru ngă pơblih tơlơi thâo hluh hăng bruă mă mơ̆ng lu mơnuih pơmin kơ tơlơi bơkơnar đah rơkơi hăng đah kơmơi. Sa amăng hơdôm boh tơhnal ba glăi anŏ tŭ yua hloh anun lĕ khul grup “Đah rơkơi kơsung nao pơgăn bruă sat taih amang amăng sang anŏ” yua khul đah kơmơi mut phung wai lăng ƀơi să Êa Kao, plơi prong Ƀuôn Ma Thuôt, tơring čar Dak Lak.

Ăt kah hăng lu đah Rơkơi amăng plơi pla mơ̆n, Y Kô Ƀuôn Krông ( Y Kô Ƀkrông) dŏ pơ ƀôn Bông, să Êa Kao, plơi prong Ƀuôn Ma Thuôt, tơring čar Dak Lak tơdơi kơ glăi mơ̆ng hmua či tlam juăt pơtum bưp nao rai ƀong mơñum, sit tơpai ruă čuă tơpa laih, bơrơjah nao rai hăng puăi kơ ană bơnai. Sang anŏ rĭm tlam mơmŏt sit măt tơpai ƀu mơak ôh, ngañ tơbañ biă mă.

Ană bơnai bral hơngal hŭi rơhyưt na nao. Thâo kơ tơlơi pơhing anun, ding kơna khul Đah rơkơi pơgăn taih amang ngă sat amăng sang anŏ să Ea Kao nao tơña bla, djru pơtô lăi. Tal blung sit mơ̆n ƀu amuñ ôh, arăng pơblih tơlơi pơmin, pran jua ngă, samơ̆ pơtô lăi na nao sui hrơi blan khom ƀel ba mơtam, dơ̆ng mơ̆ng sa čô mơnuih arăng pơtô lăi nao nao mơ̆, jing mơnuih amăng khul hyu pơtô glăi kơ mơnuih pơkŏn dơ̆ng. Y Kô brơi thâo:

"Hlâo adih aka ngă hrom khul mut phung ƀing đah rơkơi djru pơgăn tơlơi ngă sat amăng sang anŏ, kâo juăt mơñum tơpai ruă čuă tơpa glăi pơ sang bơrơjah hăng ană bơnai. Ră anai mut hrom khul laih, thâo hluh ƀiă laih anun huăi puăi sat kơ ană bơnai dơ̆ng tah, thâo gum pơgôp amăng sang anŏ.

Ră anai, ngă hrom khul pơhlôm, pơgăn tơlơi ngă sat taih amang amăng sang anŏ, kâo thâo hluh ƀiă bruă pơtô lăi kơ ană bă, ană bơnai kâo ăt thâo djru nao rai bruă amăng sang anŏ, ngă klă hiam hloh bruă mă pơkă hăng hlâo".

Dŏ hơmâo H’Ƀat Niê, Khua ƀôn Bông, să Êa Kao, plơi prong Ƀuôn Ma Thuôt, tơring čar Dak Lak lăi: Jing sa čô mơnuih ngă khua ƀôn hrơi mông pioh kơ bruă mă mơnuih mơnam lu hloh, anun yơh kơnung djuai gah rơkơi sang ƀuh ƀu mơak pran ôh; rơkơi bơnai ƀơi anŏ dŏ bơrơjah nao rai lu hloh, yua kơ rơkơi aka ƀu thâo hluh ôh bruă mă mơ̆ng bơnai ngă khua plơi.

Samơ̆ dơ̆ng rơkơi ñu ngă hrom khul đah rơkơi pơgăn tơlơi sat taih amang amăng sang anŏ hơmâo djru kơ rơkơi ñu thâo hluh djơ̆, tong ten hloh tơlơi bơkơnar đah rơkơi hăng đah kơmơi, biă mă ñu thâo khăp kơ ană bơnai amăng sang anŏ lu hloh. Amăng sang anŏ, rơkơi ñu ăt djru hrom bruă mă kơ bơnai hăng ană bă. Mơak hloh lĕ, rơkơi ñu amra ngă gêh găl kơ ñu ngă giong bruă jao amăng mơnuih mơnam plơi pla:

“Dơ̆ng mơ̆ng hrơi ngă hrom khul pơgăn ngă sat taih amang amăng sang anŏ. Bruă mă amăng sang anŏ, rơkơi kâo djru hrom mơ̆n. Mơ̆ng bruă anet hloh kah hăng bruă kâo hyu pơtô lăi mơnuih ƀôn sang amăng plơi, pơ sang lĕ bruă pơtô ană bă, čem rông, lăng ană bă yua rơkơi kâo soh djru hrom.

Tơnă asơi hơbai añam rơkơi ăt djru hrom mơ̆n. Amăng bruă pơhlôm pơgang klin Covid  phrâo anai, rơkơi ăt ngă hrom kâo. Glăi truh pơ sang sit hơmâo mông wăn, dua rơkơi bơnai ngui ngor mơak hăng ană bă, bruă hơgĕt dưi kah pơpha djru nao rai tơdruă".

Ơi Phạm Văn Sơn, khua khul đah rơkơi mut phung pơgăn tơlơi sat taih amang amăng sang anŏ să Ea Kao, plơi prong Ƀuôn Ma Thuôt, tơring čar Dak Lak brơi thâo: Khul anai akŏ pơjing mơ̆ng lơ 28/6/2019, bruă akŏ pơjing khul anai, kah hăng anih hơmâo tơlơi pơčrông sai, lăng ba, djru hrom pơsir tơlơi ƀu klă, djru djop sang anŏ, biă mă ñu ƀing đah rơkơi thâo hluh, djru bruă, ngă bơkơnar hăng đah kơmơi lơ̆m tơlơi hơdip mơda; pơđĭ tui tơlơi thâo hluh kơ ƀing đah kơmơi brơi hơdip mơda tơpă hiam, pơsir tơlơi ƀu mơak amăng sang anŏ hăng tơlơi rơ-un ƀu djơ̆ lăi ngă kơtang, taih amang tơdruă ôh.

Boh nik ñu ngă kơ ƀing đah kơmơi hrơi ba truh tơlơi sat. Hơdôm ding kơna amăng khul pơsir kơđi, ƀing hyu pơtô lăi, hur har pơblih tơlơi thâo hluh, bruă ngă, anăp nao lui hĭ tơlơi ngă sat taih amang đah kơmơi hăng čơđai muai đah kơmơi.

“Lơ̆m Khul dưi akŏ pơjing, ƀing gơmơi pơtô pơblang mơnuih amăng khul ƀing ngă bruă phun pioh hyu jak iâu pơtô lăi djop plơi pla ala ƀôn pơgăn tơlơi ngă sat taih amang amăng sang anŏ, wơ̆t hăng amăng mông jơnum khul đah kơmơi mut phung hai hơmâo hơdră pơtô pơblang brơi thâo hăng pơgăn tơlơi ngă sat taih amang amăng sang anŏ, hyu pơdah rup, hră pơar čih pơtô pơblang pơ djop plơi pla amăng să abih bang 14 boh plơi pla ala ƀôn.

Djop plơi pla lêng kơ hơmâo khul pơtruh brơi tơlơi pơhing hăng khua khul đah kơmơi, khua khul ƀing đah kơmơi pơgăn tơlơi ngă sat amăng sang anŏ kiăng thâo, sit hơmâo tơlơi hơgĕt thơ  ƀing adơi amai dưi pơtruh nao rai hơmâo hơdră djru”.

Hơdră akŏ pơjing khul đah rơkơi pơgăn tơlơi ngă sat taih amang amăng sang anŏ mơ̆ng Khul đah kơmơi mut phung să Ea Kao, plơi prong Ƀuôn Ma Thuôt, tơring čar Dak Lak ƀu kơnong djru ngă pơblih hĭ tơlơi thâo hluh bơkơnar đah rơkơi đah kơmơi đôč ôh, jing anih đah kơmơi kơnang kjăp kơ đah rơkơi laih anun ƀung čơđai muai ăt hnun mơ̆n.

Mơ̆ng anun, akŏ pơdong sa boh plơi pla, mơnuih mơnam hơdip hrom mơak klă bơkơnar soh huăi hơmâo tơlơi taih amang, bơdjơ̆ sao, djru ba pơgang tơlơi rơnuk rơnua mơak klă hrưn đĭ pơđĭ kyar thâo rơgơi soh.

Grup “Đah rơkơi nao hlâo amăng bruă pơgăn tơlơi taih amang amăng sang anŏ” să Ea Kao, plơi prong Buôn Ma Thuột, tơring čar Dak Lăk gum ngă plai ƀiă hơmâo tơlơi djơ̆ ngă, taih amang amăng sang anŏ, bơbuă tui tơlơi khăp ƀu-eng rơkơi bơnai, ama ană, mơng anun ngă hơđong hăng pơđĭ kyar hloh mơng hơdôm boh sang anŏ. Kiăng thâo hluh hloh kơ tơlơi rơgơi hyu pơtô pơblang, iâu pơthưr, gir run pơgăn tơlơi taih amang amăng sang anŏ, pơtrut kiăng dưm kơnar đah kơmơi đah rơkơi, pô hyu mă tơlơi pơhing mơng GPJPVN hơmâo tơlơi ră ruai tom yă Trịnh Thị Tuyết, Khua khul đah kơmơi să Ea Kao, plơi prong Buôn Ma Thuột, Dak Lăk.

- Ơ yă, ƀơi să anai hơmâo lu mơnuih ƀonsang djuai ƀiă, tui hăng gru grua tơlơi phiăn, đah kơmơi lĕ pô ngă akŏ sang, tui anun, bruă taih amang amăng sang anŏ juăt hiư̆m thơ?

- Amăng kual mơnuih ƀon sang djuai ƀiă ƀơi anai, gơñu djă kơnung amĭ, djŏp mơta tơlơi anet prong amăng sang anŏ hmư̆ tui đah kơmơi soh yơh. Samơ̆, sit biă ñu, ƀu djơ̆ tui anun lơi, ƀing đah rơkơi juăt dŏ mơñum tơpai, glăi mơng mă bruă lĕ juăt iâu ƀing gŏp mơñum tơpai giong anun glăi čuih ană bơnai. Tơbiă mơng anun yơh, gơmơi iâu pơthưr lu sang anŏ djuai ania ƀiă mut jơnum hrŏm amăng grup anai. Yua dah să Ea Kao hơmâo 7 boh plơi lĕ djuai ania ƀiă dŏ mơng đưm ƀơi anai. Gơmơi čang rơmang anun lĕ tơlơi yôm phun či pơtô pơblang klă bruă dưm kơnar đah kơmơi đah rơkơi hăng pơgăn tơlơi djơ̆ ngă, taih amang amăng sang anŏ ƀơi hơdôm boh plơi pla, biă ñu ƀơi hơdôm boh plơi pla mơnuih djuai ƀiă.

- Tơdơi kơ 2 thun grup “Đah rơkơi nao hlâo amăng bruă pơgăn tơlơi djơ̆ ngă taih amang amăng sang anŏ” ngă bruă, hơmâo tơlơi pơplih hiư̆m pă thơ amăng tơlơi pơmin hăng bruă ngă mơng ƀing đah rơkơi pơ anai?

- Tơdah lăi ngă klă, pơđut hlao bruă taih amang lĕ aka lơi, yua dah bruă anai ƀing ta khŏm ngă sui, samơ̆ tui hăng gơmơi sem lăng, ƀing đah rơkơi hơmâo tơlơi pơplih lu tui laih. Anun lĕ gơñu thâo hluh, thâo pap kơ bơnai gơñu, huăi hơmâo đơi dong tah tơlơi taih amang, biă ñu lĕ gơñu brơi ană bơnai ngă bruă čar, djru mơnuih mơnam, ƀing đah rơkơi huăi ƀu brơi dong tah, anai jing tơlơi pơplih prong biă yơh. Mơta dua dong, bruă amăng sang anŏ ƀing đah rơkơi thâo djru ană bơnai laih. Pơhmutu, bruă jik bruă ngă hmua lĕ ta ƀu lăi dong tah anun, samơ̆ bruă amăng sang anŏ, kah hăng djru rơmet rơmot, tơnă asơi hơbai añăm ƀing gơñu thâo djru tom laih, anun jing tơlơi pơplih prong, biă ñu tơlơi djơ̆ ngă taih amang tơdu tui mơn.

- Tui anun ta ƀuh laih amăng sang anŏ huăi hơmâo tơlơi djơ̆ ngă taih amang jing atur pơjing rai tơlơi dưm kơnar, tui anun pơ anăp anai Khul đah kơmơi să Ea Kao amra pok prong bruă ngă anai hiư̆m pă đah mơng akŏ pơjing sang anŏ huăi hơmâo tơlơi taih amang, dưm kơnar đah rơkơi đah kơmơi, ơ yă?

- Hăng Khul đah kơmơi ƀing gơmơi lĕ kâo pơsit tañ mơn pơ anăp anai, gơmơi amra pok prong hơbô̆ bruă anai. Yua dah bruă anai yôm biă mă amăng tơlơi hơdip mơda. Tal sa ñu ngă plai ƀiă hơmâo tơlơi djơ̆ ngă taih amang amăng sang anŏ, tal 2 lĕ djru đah kơmơi huăi hơmâo tơlơi pơgăn, kŏm mơng ƀing đah rơkơi tui mơng hlâo dong tah, brơi ană bơnai ngă bruă čar, gum ngă bruă amăng plơi pla. Laih dong, ƀing đah rơkơi ăt brơi ană bơnai ñu nao jơnum, ngui ngor gah gru grua, bơkơjăp drơi jăn, djru ba mơnuih ƀon sang, thâo djru ană bơnai ngă bruă amăng sang anŏ, anun lĕ tơlơi gơgrong bruă mơ̆ grup gơmơi dưi ngă. Amăng hrơi blan pơ anăp, gơmơi amra pok prong hơbô̆ bruă anai đah mơng jak iâu abih bang mơnuih gum ngă, tui anun, bruă djơ̆ ngă taih amang amăng sang anŏ amra tơdu trun hloh, biă ñu bruă ƀu dưm kơnar đah rơkơi đah bơnai huăi hơmâo dong tah.

- Hnun hă, ha wơ̆t dong kâo bơni kơ ih kơ hơdôm tơlơi ih hơmâo lăi pơthâo hăng gơmơi.

Nay Jek-Siu H’Mai: Pơblang