VOV4.Jarai-Tơdơi kơ lu thun pơdơi hĭ yua klin Covid 19, lơ 7/1, Festival braih pơdai Việt Nam tal V thun 2021 pơphun sit nik ƀơi Vĩnh Long yua Khul mơnuih ngă hmua Việt Nam, Ding jum Bruă hmua hăng Pơđĭ kyar plơi pla hăng Jơnum min mơnuih ƀôn sang tơring čar Vĩnh Long ngă hrom pơphun.

Festival pơphun lu hơdră jơnum, pơdah thâo, ngui ngor kah hăng Bơkơtuai boh thâo phrâo akŏ pơjing hăng pơtrut pơkra gơnam OCOP, jơnum bơkơtuai braih huă jơman hloh djă anăn Việt, prưng pơdă gơnam sĭ mơdrô pơđĭ kyar bơwih ƀong huă, gru grua, mơnuih mơnam tơring čar Vĩnh Long, kual ia krông Cửu Long hăng djop tơring čar, ƀôn prong amăng dêh čar.

Ƀơi mông bơkơtuai, ƀing mơnuih rơgơi kơhnâo, ƀing khua mua hăng ƀing ngă bruă sĭ mơdrô hơduah ĕp jơlan hơdră anăp nao pơkra rai gơnam sĭ mơdrô braih pơdai djă anăn Việt Nam pơđĭ kyar hơđong amăng anih sĭ mơdrô dêh čar ta hăng lŏn ia tač rơngiao.

Nay Jek: Pơblang