VOV4.Jarai- GDP thun 2021 truh pơ 2,58% lĕ tơlơi dưi prong; tơlơi pơsit mrô 128 sit nik djru hơkrŭ bruă bơwih ƀong, pơsur sĭ mơdrô; Rơnoh tuh pơ alin mơng tač rơngiao đĭ; Chứng khoán pơđĭ kyar kơtang; Mrô blơi gơnam đĭ ƀu kơtang ôh dong mơng thun 2016; sĭ hăng blơi mut tŏ tui đĭ kơtang mơn”….Hơdôm tơlơi pơhing anai phrâo hơmâo anom bruă jŭ yap, Ding jum kơčăo bruă hăng tuh pơ alin lăi pơthâo amăng mông bưp hăng khua mua pơ ala brơi hơdôm anom bruă mă tơlơi pơhing phrâo kiăng kơ lăi pơthâo mrô jŭ yap amăng bơwih ƀong huă-mơnuih mơnam rơwang tal IV hăng abih bang thun 2021. Laih dong, tơlơi bơwih ƀong huă mơnuih mơnam thun 2021 hơmâo sa, dua tơlơi kiăng kơ đing nao anun lĕ: giăm 160 rơbâo anom bơwih ƀong sĭ mơdrô pơmut nao rai hăng pơwŏt glăi bơwih ƀong - hrŏ pơhmu hăng thun 2020; huač prăk kak đĭ 0,81%. Hơmâo 2 mơta bruă dưi rơnoh pơđĭ kyar hrŏ trun kơtan lĕ tuai čuă ngui hăng mrô tuai mơng tač rơngiao rai pơ Việt Nam hrŏ trun giăm 96%.

Tơlơi lăi pơthâo glăi mơng Anom jŭ yap brơi ƀuh, thun 2021, abih bang prăk pơhrui glăi mơng gơnam sĭ hăng blơi mơng dêh čar tač rơngiao hmâo rơbêh kơ 668 klai 500 klăk dolar Mi, amăng anun prăk pơhrui glăi mơng gơnam sĭ kơ dêh čar tač rơngiao hmâo 336 klai 250 klăk dolar Mi, đi 19% bơhmu hăng thun 2020. Lăp đing nao, amăng thun 2021 hmâo 35 mơta gơnam pơhrui hmâo rơbêh kơ 1 klai dolar Mi, dưm dưm hăng 93,8% mrô prăk sĭ gơnam kơ dêh čar tač rơngiao, amăng anun hmâo 8 mơta gơnam sĭ hmâo rơbêh kơ 10 klai dolar Mi, dưm dưm hăng 69,7%. Thun 2021 cih hmâo djơ̆ rơnoh pơkă sĭ mơdrô (4 klai dolar Mi), pơđom pioh thun tal 6 tô̆ tui tlôn Việt Nam dưi sĭ gơnam amăng bruă sĭ mơdrô đơ đam rŏng lŏn tơnah bơdjơ̆ nao prong, akă ƀu hmâo mơng hlâo yua kơ klin Covid-19. Bôh tơhnal đĭ kyar mơng bruă sĭ gơnam kơ dêh čar tač rơngiao thun 2021 lĕ gru rơđah amăng pơđĭ kyar bơwih ƀong lŏn ia./.

Siu Đoan-Siu H’Prăk: Pơblang