VOV4.Jarai-Tơdơi kơ lu hrơi rơgao ƀu hơmâo mơnuih ƀă phrâo, truh mơguah lơ 26/9, ƀơi Gia Lai čih pioh hơmâo 17 čô mơnuih ƀă kman Covid 19 amăng plơi pla. Amăng anun, hơmâo 15 čô mơnuih ƀă amăng plơi prong Pleiku hăng 2 čô pơ tơring glông Đak Đoa. Rơđah biă mă ñu, ƀơi plơi prong Pleiku, 15 čô mơnuih dŏ ƀơi grup 11, phường Hoa Lư.

Ră anai, anom bruă ia jrao pel ĕp tơlơi duăm ruă tơring čar Gia Lai brơi tui kru ĕp 22 čô mơnuih F1, 26 čô mơnuih F2 jĕ giăm hăng ƀing ƀă kman anai. Lăp gleng nao biă mă, 2 čô mơnuih phrâo ƀuh ƀơi tơring glông Đak Đoa lêng kơ glăi mơ̆ng ƀôn prong HCM amăng mlam lơ 21/9 hăng rơdêh sang anŏ gơñu pô, samơ̆ pơhaih bruă ia jrao ƀu tơpă ôh bĕ đuăi hŭi brơi nao dŏ pơčlah.

Lơ̆m pơhaih pơ sang ia jrao să Adơk, tơring glông Đak Đoa, gong gai kơnuk kơna tơring glông brơi nao dŏ pơčlah pơ sang anŏ mơ̆ng lơ 25/9, samơ̆ abih dua čô anai ƀu ngă tui djơ̆ tơlơi pơtrun ôh, ăt đuăi hyu pơ lu anih anom amăng plơi prong Pleiku hăng tơring glông Đak Đoa.

Siu Đoan: Pơblang