VOV4.Jarai-Thun 2021, Gia Lai pơđĭ kyar bơwih ƀong huă truh 9,7%, lu hloh amăng kual Dap Kơdư, prăk pơhrui jia kơ kơnuk kơna giăm 7.600 klai. Thun 2022, tơring čar gir run pơđĭ kyar 8,6%, ngă djơ̆ tơhnal pơtrun bơwih ƀong huă mơnuih mơnam hăng pơhlôm, pơgang klin Covid 19. Kơtưn hnong pơđĭ kyar bơwih ƀong huă 8,65%, pơkă dưm dưm rĭm čô mơnuih mă bruă pơhrui glăi sa thun 60 klăk 44 rơbâo prăk, prăk jia pơhrui glăi rơbêh 5.800 klai, amăng anun hơmâo hơdôm tơhnal pơtrun phun tơring čar Gia Lai anăp nao amăng thun 2022.

Tui hăng anun, tơring čar ăt pơtrut pơđĭ kyar ngă tui boh thâo ia rơgơi, ngă hrom pơgang rơnoh sĭ mơdrô, pơđĭ kyar bruă mă yua apui lơtrik pơkra ming glăi; Laih dơ̆ng, pơtum pơsir hĭ tơlơi tơnap, gun gan amăng bruă tuh pơ alin, pơđĭ tui hnong pơhno bruă mă PCI, pơblih bruă mă ngă hră pơar kơ ană plơi pla. Pơtrut pơkra jơlan glông, man pơdong sang bruă djơ̆ lăp, hơdôm kơčăo bruă phun; pơtrut pơđĭ kyar man pơdong plơi prong tui anŏ pơkă, akŏ bruă jao, anăp nao plơi pla mơtah mơda pla kyâo hiam, rơgơi hăng hơđong.

Tơring čar Gia Lai ăt pơtong, bruă pơhlôm, pơgang klin Covid 19 jing bruă mă phun, ječ ameč hăng khom ngă na nao, lir hơbit hăng bruă mă pơtrut bơwih ƀong huă mơnuih mơnam thun 2022 laih anun hơdôm thun tŏ tui.

Nay Jek: Pơblang