VOV4.Jarai-Mah bơbeč djơ̆ klin kheng Covid 19 ngă, samơ̆ amăng 6 blan akŏ thun 2021, hnong pơđĭ kyar bơwih ƀong huă ƀơi Gia Lai ăt đĭ truh 9,7%, đĭ lu hloh pơkă hăng tal anai mơ̆n thun hlâo. Tơlơi pơhing anai pôr pơthâo lơ̆m jơnum lok 2, khua mua pơ ala mơnuih ƀôn sang tơring čar rơwang bruă thun 2021-2026, pơphun mơguah lơ 9/8 ƀơi plơi prong Pleiku. Tui hăng hră lăi pơthâo ƀơi mông jơnum, hăng rơnoh jŭ yap gơnam sĭ mơdrô amăng tơring čar pơhrui glăi hơmâo 9,7% amăng 6 blan akŏ thun 2021 Gia Lai đĭ hloh 2,33 wơ̆t pơkă hăng thun 2020.

Ăt amăng 6 blan akŏ thun mơ̆n, tơring čar ngă tui sa hnong lu hơdră pơhlôm, pơgang klin Covid 19 ƀă hyu amăng kual plơi pla, pơphun tlâ̆o vaccine pơgang Covid 19 kơ rơbêh 47 rơbâo 800 čô mơnuih brơi tlâ̆o blung a. Jơnum lok 2, rơwang bruă thun 2021-2026, khua mua pơ ala mơnuih ƀôn sang Gia Lai pơphun amăng dua hrơi lơ 9 hăng lơ 10/8, sem lăng, pơčrông sai, pơsit hĭ 12 hră lăi pơthâo hăng hră pơtrun mơ̆ng jơnum.

Amăng anun, hră pơtrun čih pơkra glăi hră pơtrun mrô 100 mơ̆ng khua mua pơ ala mơnuih ƀôn sang tơring čar pơkă glăi 3 mơta djuai glai rưng mơ̆ng thun 2025-2030, tơlơi anun pơhưč lu mơnuih đing nao hloh.

Nay Jek: Pơblang