VOV4.Jarai - Ƀơi kual Dap Kơdư, hơdôm boh tơring čar hơmâo pơphun ngă laih Blan kông ñơn hăng lu bruă ngă sit nik. Yă Trần Lệ Nhung - Khua Khul pơlir hơbit mơnuih mă bruă tơring Gia Lai brơi thâo: Kiăng dưi ngă tŭ yua Blan kông ñơn thun 2021, rơngiao kơ bruă pơphun lu bruă tŭ yua, hơmâo lu hlăk ai, mơnuih mă bruă čơkă ngă hrŏm, djŏp gưl khul mut phung mơnuih mă bruă amăng tơring čar ăt pơƀut ngă dong 4 mơta bruă yôm kah hăng: jơlan hơdră “75 rơbâo tơlơi pơčeh phrâo, găn rơgao tơnap tap, pơđĭ kyar”; jơlan hơdră “Pơhmư̆ tui - Thâo hluh - djru nao rai” hăng ƀing hlăk ai, mơnuih mă bruă; pơphun ngă bruă “Bơni kơ mơnuih mă bruă” hăng bơni kơ hlăk ai, mơnuih mă bruă djŏp gưl amăng Khul mut phung tơring čar.

Tal anai, Khul pơlir hơbit mơnuih mă bruă tơring čar Gia Lai pơphun ngă Blan mă bruă rơnuk rơnua hơdjă ƀơi anih mă bruă thun 2021 pơphun mơng lơ 1 truh lơ 31/5 hăng anăn ñu “Pơđĭ tui bruă pơtŏng glăi, wai pơgang djŏp tơlơi truh sat amăng anih mă bruă hăng hơmâo tơlơi gum djru mơng ƀing apăn bruă wai lăng rơnuk rơnua hơdjă anih mă bruă”. Ƀơi mông pơphun, Khul pơlir hơbit mơnuih mă bruă tơring čar hơmâo brơi 530 klăk prăk mơng Keh prăk djru mơnuih mơnam djru man pơdong sang dŏ hăng pơkra ming 17 boh sang “pơđao pran gum pơgôp mơng khul mut phung” kơ ƀing hlăk ai, mơnuih mă bruă tơnap tap kơ sang dŏ.

Gia Lai djru man pơdong, pơkra sang dŏ “Pơđao tơlơi gum pơgôp mơng Khul mut phung”.

Tơdơi kơ ngă lơphet pơphun bruă mă mơ̆ng Anom bruă mơnuih tơpuôl Gia Lai, anom bruă mơnuih tơpuôl kông ty sa ding kơna Kơsu Čư̆ Pah ăt pơphun bruă mă Blan kông ñơn hăng Blan ngă bruă pơhlôm pơgang tơlơi hơđong rơnuk rơnua hơdjă rơnăk bruă mă thun 2021. Amăng blan kông ñơn thun anai, anom bruă mơnuih tơpuôl kông ty pơphun lu bruă mă pơtô lăi mơnuih mut phung, mơnuih mă bruă apah thâo hluh yom kơ hrơi jar kmar pơdơi mă bruă; pơtô pơblang kơ jơlan hơdră akŏ pơjing gưl mơnuih mă bruă ngă kông ñơn Việt Nam tui hăng Hră pơtrun tal XIII  mơ̆ng ping gah dêh čar; pơphun jơnum bưp nao rai hăng mơnuih mă bruă hăng anăn : Pơđing hmư̆-thâo hluh-kah pơpha, pơtong glăi ĕp lăng tơlơi či truh lơ̆m mă bruă, pơgang hơdjă lơ̆m mă bruă laih anun ngă hrom hyu čuă jơmư sang anŏ tơnap tap, hơmâo tơlơi truh lơ̆m mă bruă; man pơdong hăng jao sang khăp pap kơ mơnuih mă bruă dŏ ƀun rin, sang pơ anăn sang pơđao mơnuih tơpuôl kơ sang anŏ dŏ tơnap tap.

Siu H’Mai - Nay Jek: Pơblang