VOV4.Jarai - Tui hăng Anom bruă jŭ yap Gia Lai, thun 2021, mrô đĭ kyar bơwih ƀong huă hơmâo 9,71%, prăk tuh pơ alin mơng abih bang him lăng hơmâo 70.000 klai prăk, lu 2,45 wơ̆t pơhmu hăng thun hlâo. Lăp đing nao lĕ prăk pơhrui đĭ lu biă, hăng 7.592 klai prăk, đĭ giăm 167%. Mrô anai đĭ gah bơnah lĕ yua hơmâo 17 kơčăo bruă apui lơtrik pơkĕ jua angin, dưi hơmâo rơbêh 1.242 MW; lu kơčăo bruă rông un prong biă, mă yua boh thâo phrâo.

Gia Lai hơmâo mă yua laih 11 kơčăo bruă pơkra apui pơkĕ jua angin.

Thun 2021, prăk pơhrui glăi mơng bruă sĭ gơnam kơ tač rơngiao mơng tơring Gia Lai hơmâo 610 klăk đolar, đĭ rơbêh 5%; amăng anun, kơphê hăng boh troh jing bruă bơwih ƀong lu hloh, yua mă yua abih tơlơi gêh gal mơng Hră pơkôl EVFTA. Tơring čar hơmâo thim 13 boh să hăng 2 boh tơring glông dưi ngă giong bruă man pơdong plơi pla phrâo. Biă ñu, amăng thun rơgao, Kual lŏn kơdư Kon Hà Nừng hơmâo UNESCO čih anăn jing Anih djă pioh sinh quyển rŏng lŏn tơnah. Tơlơi anai jing pok rai tơlơi gêh gal prong kơ tơring čar jak iâu bruă pơgang glai rưng, bruă tuai čuă ngui, pơđĭ kyar bơwih ƀong huă yŭ kyâo glai.

Siu H’Mai: Pơblang