VOV4.Jarai - Jing sa boh tơring čar hơmâo giăm 50% mrô mơnuih djuai ƀiă lĕ djuai ania Jrai, Bahnar, rơbêh 10 thun rơgao, anom bruă pơtô hrăm tơring čar Gia Lai lêng lăng ba bruă pơtô hăng hrăm tơlơi Jarai, Bahnar amăng sang hră gưl sa, kiăng pơđĭ tui tơlơi thâo hluh, djă pioh gru grua hiam mơng tơlơi pơhiăp, gru grua tơlơi phiăn mơng djŏp djuai ania ƀiă kual Dap Kơdư. Mơng thun hrăm 2010-2011, Gơnong bruă pơtô hăng pơjuăt bruă tơring čar Gia Lai git gai ba bruă pơtô tơlơi pơhiăp djuai ƀiă amăng bruă pơtô hrăm mơng sang hră. Truh ră anai, hơdôm boh sang hră lêng pơtô tui hăng jơlan hơdră jao. Tui anun, jơlan hơdră pơtô hrăm tơlơi djuai ƀiă hơmâo hơdôm boh sang hră pioh mông pơtô lăp djơ̆, pơtô djŏp mrô pơkă, djơ̆ hăng tơlơi kiăng mơng ƀing čơđai sang hră ăt kah hăng amĭ ama ƀing čơđai.

Siu H’Mai: Pơblang