VOV4.Jarai-Mơguah lơ 8/12, jơnum lok 4, khua mua pơ ala mơnuih ƀôn sang tơring čar Gia Lai tal XII rơwang bruă mơ̆ng thun 2021-2026 pok jơnum sit nik. Jơnum lok anai, sem lăng hơdôm pok hră lăi pơthâo pơtong glăi ngă tui Hră pơtrun Jơnum min pơ ala mơnuih ƀôn sang tơring čar pơkă kơ bruă bơwih ƀong huă mơnuih mơnam, pơgang lŏn ia, rơnuk rơnua dêh čar thun 2021 hăng hơdôm bruă mă, či pơsir tơlơi kiăng amăng thun 2022.

Mông jơnum abih bang khua mua pơ ala mơnuih ƀôn sang Gia Lai

Mah klin kheng Covid 19 tơnap, samơ̆ amăng thun 2021, tơlơi pơhing duh jia pơhrui prăk jia ƀơi Gia Lai ăt đĭ lu. Rơđah biă mă ñu, rơnoh prăk pơhrui glăi amăng đơ đam tơring čar truh 7 rơbâo 386 klai, dưm dưm hăng 162% akŏ bruă mơ̆ng gơnong dlông jao, rơgao 83% pơkă hăng tal anai thun 2020.

Rơnoh gơnam pơkra ming amăng tơring čar hơmâo rơbêh 9% GDP, pơkă hnong pơhrui glăi mơ̆ng rĭm čô mơnuih ƀôn sang ngă bruă sa thun rơbêh 56 klăk prăk. Thun anai, hơmâo dơ̆ng 17 boh să dưi ngă djơ̆ tơhnal pơkă plơi pla phrâo, pơđĭ tui mrô să ngă djơ̆ tơhnal pơkă anai 87 boh să.

Samơ̆, amăng thun 2021, tơring čar Gia Lai ăt dŏ 4/18 tơhnal pơkă ƀu dưi ngă djop. Ƀơi mông jơnum anai, khua mua pơ ala mơnuih ƀôn sang tơring čar sem lăng, bơkơtuai 33 kơčăo bruă ngă hră pơtrun pioh pơsit tal jơnum anai.

Nay Jek: Pơblang