VOV4.Jarai - Kiăng prăp lui klă kơ tal pơplông abih anih 12, Gơnong bruă pơtô hăng pơjuăt bruă tơring čar Gia Lai hơmâo čih pơkra hơdră hăng 4 hơnong pơgang klin Covid-19. Tui hăng gơnong bruă pơtô hăng pơjuăt bruă tơring Gia Lai, tal pơplông abih anih 12 thun anai, tơring čar hơmâo rơbêh 14 rơbâo čô čơđai sang hră nao pơplông, hơmâo pơphun ƀơi 39 anih. Ră anai, hrŏm hăng pơtô brơi ƀing čơđai hơdor glăi tơlơi hrăm, Gia Lai ăt hyu pôr pơhing, lăi pơthâo tañ kơ ƀing khua, nai pơtô, mơnuih mă bruă amăng sang hră hăng ƀing čơđai sang hră, amĭ ama ƀing čơđai kơ tơlơi klin kheng hrŏm hăng tơlơi pơtă pơtăn mơng anom bruă ia jrao kơ bruă pơgang klin. Pơphun ngă tui tơlơi pơtrun 5K, amăng mông pơplông hăng tơdơi kơ hrơi pơplông...kiăng hrơi pơplông rơnuk rơnua, djơ̆ hrơi pơkă amăng akŏ blan 7 pơ anăp. Gơnong bruă pơtô hăng pơjuăt bruă tơring čar Gia Lai git gai ƀing čơđai sang hră nao pơplông, ƀing nai wai lăng čơđai pơplông hăng ƀing mă bruă amăng mông pơplông khŏm pơhaih kơ ƀing ơi ia jrao hlâo kơ 7 hrơi či pơphun pơplông.

Siu H’Mai: Pơblang