VOV4.Jarai - Hơdôm boh sang hră gưl 3 ƀơi tơring čar Gia Lai pre lui djŏp laih kơ hrơi pơplông abih anih 12 pơphun rơnuk rơnua, amăng hrơi mông glăk hơmâo klin Covid-19.

Ƀơi sang hră gưl 3 Nguyễn Bỉnh Khiêm, tơring kual Čư̆ Sê, tơring glông Čư̆ Sê, tơring čar Gia Lai, ƀing čơđai hrăm anih 12 glăk ječ ameč hrăm hơdor glăi boh hră hăng pơblang lăng hlâo djŏp tơlơi tơña pơlông. Ƀing nai mơng sang hră Nguyễn Bỉnh Khiêm ăt pơtă pơtăn kiăng ƀing čơđai hơđong pran jua pơkra tơlơi pơplông dưi hloh. Nai pơtô Trần Thị Hồng Uyên, nai pơtô tơlơi hrăm Ngữ Văn, sang hră gưl 3 Nguyễn Bỉnh Khiêm brơi thâo:

“Amăng mông pơtô hăng hrăm lĕ ƀing čơđai hăng kâo ngă tui klă tơlơi pơtrun pơgang klin 5K, 100% ƀing čơđai hrăm hră lêng gôm ƀô̆, rao tơngan hăng ia čơƀu. Amăng hrơi mông klin kơtang tui anai, bruă pơtô hrăm amra bưp lu tơlơi tơnap, ƀing čơđai hrăm ƀu klă đơi lơi yua klin ngă mơng thun hlâo truh ră anai. Nai pơtô, khua sang hră, ƀing čơđai ngă hrŏm hăng grup hlăk ai djru bruă pơtô hrăm tơlơi pơplông klă hloh, jum alum amĭ ama ƀing čơđai, pơtă pơtăn kơ ană bă gơñu gir nao hrăm djŏp tơlơi hrăm pioh pơplông anih 12”.

Ƀing čơđai gôm ƀô̆, rao tơngan amăng hrơi hrăm hră.

Tal pơplông thun anai, Sang hră gưl 3 Nguyễn Bỉnh Khiêm (tơring glông Čư̆ Sê) hơmâo prăp lui 23 anih pơplông hăng rơbêh 300 čô čơđai nao pơplông. Tui hăng nai Nguyễn Hải Hà - Khua sang hră gưl 3 Nguyễn Bỉnh Khiêm, tơdơi kơ Gơnong bruă pơtô hăng pơjuăt bruă tơring čar Gia Lai jŭ yap lăng mrô mơnuih nao pơplông, anom bruă ječ ameč dưm dăp, rơmet lui anih pơplông. Rơngiao kơ anun, sang hră ăt prăp lui ia čơƀu rao tơngan, bơnal gôm ƀô̆, măi pơkă pơ-iă amăng drơi...kiăng pơhlôm pơgang klin Covid-19 amăng abih hrơi pơplông.

“Tơdah hơmâo ƀing čơđai F1, F2 lĕ khŏm lăi pơthâo hlao kơ Gơnong bruă. Gơnong bruă pơtô hăng pơjuăt bruă pơtrun lĕ pơhaih pơ sang ia jrao hlâo kơ hrơi pơplông 7 hrơi kiăng thâo rơđah čơđai, nai wai lăng čơđai pơplông bưp pô hlơi, nao pơ pă. Khua gơnong bruă pơtô hăng pơjuăt bruă tơring čar ăt jao mơn tơdah pioh hơmâo mơnuih dŏ jê̆ giăm F0, F1 lĕ anom bruă anai khŏm glăm ba tơlơi ngă soh yơh, kiăng ngă hiư̆m pă kiăng hrơi pơplông anih 12 hơmâo ngă klă”.

Nai Trần Văn Lượng, Khua sang hră gưl 3 Tôn Đức Thắng, tơring glông Đức Cơ brơi thâo, tal pơplông abih anih 12 thun anai rơngiao kơ ngă tui klă hơdră pơgang klin hăng pơtô kiăng čơđai hơdor glăi tơlơi hrăm, ƀing nai ăt djru ba čơđai sang anŏ tơnap tap mơn kiăng ƀing gơñu pơplông đĭ amăng hrơi pơplông pơ anăp.

“Sang hră amra pơphun pơplông abih anih 12 tui 2 bơnah, tơdah klin dŏ hnong tui ră anai lĕ sang hră amra pơtô ƀing čơđai hrăm hră ƀơi sang hră mơtăm. Hơdôm tơlơi hrăm lĕ ƀing nai amra čih lui hlâo, prăp lui klă hlâo či nao pơtô. Tơdah klin kơtang hloh lĕ ƀing nai in abih hơdrôm hră hrăm brơi kơ ƀing čơđai kiăng ƀing čơđai hrăm lăng nao rai amăng plang internet tui tơlơi git gai mơng Gơnong bruă pơtô hăng pơjuăt bruă. Ƀing čơđai djuai ƀiă hrăm ƀơi anai lu biă, kơƀah prăk biă mă, sang hră amra djru brơi đôč hơdôm hơdrôm hră brơi ƀing čơđai hrăm đah mơng plai ƀiă rơngiă prăk”.

Tal pơplông thun anai tar ƀar tơring čar Gia Lai hơmâo rơbêh 14.000 čô čơđai hăng 39 anih pơplông sit nik hăng 17 anih pơplông pơhlôm lui hlâo ƀơi 17 boh tơring glông, plơi prong, hăng 616 boh sang hră. Him lăng amra hơmâo 1282 čô nai wai lăng čơđai pơplông, 20 čô dŏ krăp lăng gah rơngiao hăng giăm 500 čô mơnuih djru kah hăng kông ang, ơi ia jrao, mơnuih wai lăng rơnuk rơnua.

Ơi Nguyễn Văn Long, Kơ-iăng khua Gơnong bruă pơtô hăng pơjuăt bruă tơring čar Gia Lai brơi thâo, Gơnong bruă pơtô hăng pơjuăt bruă tơring čar Gia Lai hơmâo čih pơkra hơdră pơplông anih 12 hăng 4 hnong kiăng pơgang glăi klin Covid-19. Mơng hrơi anai truh hrơi pơplông, Khul wai lăng tơlơi pơplông ƀơi Gia Lai prăp lui pơgang glăi tơlơi truh sat tơdah hơmâo kiăng hrơi pơplông rơnuk rơnua, ngă ƀai klă hloh.

“Gơnong bruă pơtô hăng pơjuăt bruă git gai djŏp anom bruă ƀrô pok pơhai bruă mă kơ hrơi pơplông djơ̆ tơlơi phiăn, djơ̆ akŏ bruă, ƀrô pơhlôm pơgang klin amăng hrơi blan glăk hơmâo klin Covid-19 tui ră anai. Amăng anun hơmâo 4 hơdră pơphun pơplông dưm dưm hăng 4 hnong pơkă klin tơdu kơtang, ngă tui klă tơlơi pơtrun 5K hlâo, amăng hăng tơdơi hrơi pơplông. Gơnong bruă ăt hơmâo hră črâo brơi čơđai sang hră, nai pơtô amăng mông pơplông anai khŏm pơhaih gah ia jrao hlâo kơ 7 hrơi pơphun pơlông laih anun mơ-it abih tơlơi pơhing anih čih anăn pơplông, anih pơplông đah mơng thâo pơsir bruă”.

Hoàng Qui: Čih - Siu H’Mai: Pơblang