VOV4.Jarai-Yang Trung lĕ să blung a mơ̆ng tơring glông tơnap tap Kông Chro, tơring čar Gia Lai ngă giong tơhnal pơkă plơi pla phrâo. Lơ̆m dưi ruah jing să gru hlâo, Yang Trung kiah ngă giong 7/19 tơhnal pơkă; đơ đam să lĕ rơbêh 50% mrô sang anŏ mơnuih djuai ƀiă, tơlơi hơdip mơda tơnap tap biă mă.

Khua mua ping gah, gong gai kơnuk kơna să hăng djop khul grup mơnuih tơpuôl pok pơhai lu hơdră, kơčăo bruă, biă mă ñu brơi bơblih hơdră ngă hmua pla pơjing, bơblih pơjeh djuai phun pla. Amăng să hơmâo dua boh anom ngă ƀong hrom,  abih dua boh anom bruă anai djru pơsir bruă mă, pơđĭ rơnoh prăk pơhrui glăi kơ ding kơna ngă hrom hăng mơnuih ƀôn sang amăng să.

Yua kơ anun,  thun 2020, hnong pơhrui glăi rĭm čô mơnuih sa thun amăng să Yang Trung truh rơbêh 41 klăk prăk, mrô sang anŏ ƀun rin trun hrŏ dŏ 4,15% đôč.

Nay Jek: Pơblang