VOV4.Jarai - Anom bruă tơhan pôlih wai lăng bruă bơwih ƀong (kông ang tơring čar Gialai) gum hrŏm hăng hơdôm anom bră bơdjơ̆ nao amăng tơring glông Kbang, Gialai ĕp ƀuh dong 1 anom bơwih ƀong sĭ mơdrô hơmâo hơdôm pluh m3 kyâo aka ƀu thâo mă mơng pă. Sit biă ñu, yua anom bơwih ƀong ƀu gum hrŏm lơ̆m pel ĕp, ngă rơngiă hrơi mông, anom bruă bơdjơ̆ nao kah mơng pơphun pel ĕp tong ten kyâo anai mă mơng pă. Mơguah lơ 15/7, lơ̆m ƀing gơñu pok bah amăng, anom bruă bơdjơ̆ nao mut nao pel ĕp, blung hlâo ƀuh giăm 18 m3 kyâo arăng uă laih hăng lu djuai kyâo.

Găn rơgao 24 mông , khua anom bruă anai ƀu lăi pơthâo anih mă mrô kyâo anai laih hăng hră pơ-ar bơdjơ̆ nao mrô kyâo anai. Laih dong, lơ̆m anom bruă bơdjơ̆ nao jŭ yap glăi mrô kyâo anai, hơmâo 7 čô đah rơkơi tui nao, hăng lăi ƀing gơñu mơ-it mrô kyâo dưm ƀơi anai lĕ ƀơi anom bruă Mai Hồng. Ră anai, tơhan kông ang tơring čar Gialai hăng kông ang tơring glông Kbang glăk tŏ tui pel ĕp kiăng kơ ngă rơđah. Mrô kyâo anai glăk hơmâo tơhan kông ang pơdŭ pơgiăng glăi pơ Anom bruă wai lăng đang glai tơring glông Kbang pioh pơsir ngă rơđah.

Siu Đoan: Pơblang