VOV4.Jarai - Khă tơlơi klin Covid-19 ngă tơnap, samơ̆ 6 blan rơgao, tơring čar Gialai ăt ngă tui djơ̆ rơnoh đĭ kyar 9,7% mơn. Bôh tơhnal anai dưi djru brơi mơng bruă tơring čar ngă gal brơi pơđĭ kyar 2 gơnong bruă bơwih ƀong ba jơlan hlâo lĕ apui yua pơkra glăi hăng rông hlô tui hơdră phrâo. Anun lĕ tơlơi pơsit dưi ba tơbiă amăng mông Jơnum Grŭp mă bruă Ping gah tơring čar tal 4 (pơhư prong) dưi hmâo Ping gah tơring čar Gialai pơphun amăng lơ 2/7. Tui hăng tơlơi lăi pơthâo amăng mông jơnum, 6 blan rơgao, abih bang nua gơnam pơkra rai mơng măi mok ƀơi tơring čar hmâo rơbêh kơ 11 rơbâo klai prăk, đĭ rơbêh kơ 17% bơhmu hăng thun hlâo; abih bang prăk tuh pơplai amăng mơnuih mơnam ƀơi tơring čar Gialai him lăng hmâo giăm truh 33.500 klai prăk. Ha mơkrah amăng mrô anai dưi pơjing rai biă ñu yua kơ pok pơhai hơdôm rơwang bruă pơkĕ apui hăng angin ƀơi tơring čar, hăng mrô prăk rơbêh kơ 17 rơbâo klai prăk. Hrom hăng anun, ră anai Gialai hmâo 33 rơwang bruă rông hlô tui hơdră phrâo dưi lăng lĕ hơdră pơtrun tuh pơplai, hăng mrô prăk rơbêh kơ 4.500 klai prăk. Ăt amăng hơdôm hrơi rơgao mơn, tơring čar hmâo pla phrâo laih 131 ektar đang kyâu, pơplih rơbêh kơ 700 ektar phun pla ƀu tŭ yua./.

Siu H’ Prăk: Pô pơblang