VOV4.Jarai - Ră anai, tơring čar Gialai hmâo 16/17 rơwang bruă pơdŏng, hăng abih bang dưi kĕ rơbêh kơ 1200 MW, hăng abih bang prăk mă yua rơbêh kơ 40 rơbâo klai prăk. Khă hnun hai, bruă hơdôm pô tuh pơplai “đuăi tui” pơdŏng kiăng hmao pơkĕ apui tañ hlâo kơ lơ 31/10/2021 kiăng čơkă mă nua hmâo hmăi hloh tui hơdră pơtrun mơng Kơnuk kơna ngă tơbiă rai lu mơta tơlơi ƀu gal amăng pơdŏng hăng mă yua mơnuih mă buă. Jơnum min mơnuih ƀôn sang tơring čar Gialai brơi thâo, tơring čar glăk đing nao pơsir hăng amra tañ pơsir pơđut hơdôm tơlơi akă gal.

Lom pơdŏng rơwang bruă pơkĕ apui hăng jua angin ƀơi Gialai tơbiă rai lu mơta tơlơi

Tui hăng bôh tơhnal pel ĕp rơnuč blan 4/2021 mơng Gơnong bruă sĭ mơdrô tơring čar Gialai, ră anai, hmâo 16/17 rơwang bruă pơkĕ apui hăng jua angin ƀơi tơring čar glăk pơdŏng, samơ̆ lu pô tuh pơplai akă ngă giong ôh hră pơ-ar apah lŏn tui tơlơi pơkă amăng Tơlơi phiăn lŏn drŏn. Biă ñu lĕ, hmâo sa dua rơwang bruă ƀơi tơring glông Krông Čro pơdŏng sa dua bôh anih anom amăng lŏn pla kyâu. Ơi Nguyễn Duy Lộc, Kơ-iăng Khua Gơnong bruă sĭ mơdrô tơring čar Gialai brơi thâo, bôh than lĕ yua kơ anai leng kơ hơdôm ring bruă gưl 1, gah Ding jum sĭ mơdrô dêh čar wai lăng. Lom pơdŏng, hơdôm bôh anom kơnong kơ kiăng lăi pơthâo kơ gong gai plơi pla (gưl tơring glông),  anun lom pel ĕp bôh nik amăng rơnuč blan 4/2021, gơnong bruă sĭ mơdrô mơng thâo. Hăng hơdôm rơwang bruă pơkĕ apui hăng jua angin ƀơi anih pla kyâu, Gơnong bruă amra rơkâo ba tơbiă kual lŏn anai mơng kual lŏn pơkă pla kyâu. Ơi Nguyễn Duy Lộc, Kơ-iăng Khua Gơnong bruă sĭ mơdrô tơring čar Gialai brơi thâo, anom glăk gum hrom hăng hơdôm gơnong bruă hăng pô tuh pơplai rơwang bruă pơkĕ apui hăng jua angin pơplih pơkra, ngă giong hră pơ-ar tui tơlơi pơkă:

 “Hơdôm anom bruă lăi pơdah lĕ lom pơphun pơdŏng, hră pơ-ar rơkâo apah lŏn glăk pel ĕp, hơdôm ƀirô apăn bruă glăk kơsem min. Gơnong bruă sĭ mơdrô glăk pơphô klă kơ tơring čar anai. Pran jua lĕ pơpŭ tơlơi phiăn, ƀing gơmơi ngă gal brơi kơ pô tuh pơplai pơtlaih tơlơi tơnap hmao tlôn hơdôm gơnam măi mok truh pơ̆ tơkai ring bruă, ƀu djơ̆ tơlơi ngă gal brơi tlaih hĭ tơlơi phiăn ôh.”

Tơring čar Gialai glăk đing nao pơsir, pơtlaih hơdôm tơlơi phrâo hmâo     

Tơlơi ƀuh gun pơkon ƀơi hơdôm rơwang bruă pơkĕ apui hăng jua angin ră anai lĕ bruă mă yua giăm truh 300 čô mơnuih mă bruă dêh čar tač rơngiao (biă ñu lĕ mơnuih dêh čar Khač) akă dưi pơsit brơi hră pơ-ar ôh. Ơi Nguyễn Văn Lộc – Kơ-iăng Khua Anom bruă gơgrong gah Anom bruă Jơnum min mơnuih ƀôn sang tơring čar Gialai brơi thâo, hmâo laih hră pơ-ar mơng Jơnum min mơnuih ƀôn sang tơring čar Gialai rơkâo sa dua bôh anom đing nao pơsir tơpă tơlơi anai. Pran jua lĕ, tơdah anom bơwih ƀong ƀu ngă giong hră pơ-ar kơ mơnuih juăt bruă dêh čar tač rơngiao tui tơlơi pơkă, tơring čar amra pơkiăo glăi hơdôm mơnuih mă bruă ƀu hmâo hră pơsit:

 “Tơring čar črâo ba jao hơdôm bôh ƀirô apăn bruă pel ĕp rim hră pơ-ar, mơnuih hơpă rai hrơi hơbin lĕ, mơnuih juăt bruă ƀudah mơnuih mă bruă kiăng mă yua hơdôm tơlơi pơsit tơhmal hăng prăk pioh kơ mơnuih mă bruă hăng anom bơwih ƀong mă yua mơnuih mă bruă. Ƀu djop tơlơi pơkă lĕ pơkiăo glăi. Bruă gơgrong phun ƀơi anai gah bruă wai lăng, pel ĕp hră pơsit mơnuih mă bruă lĕ Gơnong bruă wai lăng mơnuih mă bruă tơhan rơka ruă hăng mơnuih mơnam, pơkiăo glăi ƀudah ƀu pơkiăo glăi lĕ kông ang tơring čar ba tơbiă. Samơ̆ yua kơ bruă anai glăk pơsir hră pơ-ar anun hơdôm bôh anom hmâo laih hră rơkâo pơhrơ̆i hrơi blan pioh pơsir.”

Siu H’ Prăk: Pô pơblang