VOV4.Jarai - Truh rơnuč blan 10/2021, ƀơi tơring čar Gialai hơmâo rơbêh 42.600 čô mơnuih glăi mơng hơdôm tơring čar, ƀôn prong kual Dơnung pioh pơgang klin. Tơring čar glăk đing nao ĕp brơi bruă mă kơ ƀing mơnuih anai, kiăng pơhlôm brơi tơlơi hơdip bruă mă amăng hrơi blan hơmâo klin.

Amăng bơyan pĕ kơphê anai lu mơnuih amra hơmâo bruă mă

Amăng blan 10/2021, gơnong bruă mă, tơhan rơka hăng mơnuih mơnam tơring čar Gialai hơmâo gum hrŏm hăng hơdôm tơring čar Bình Dương, Đồng Nai, ƀôn prong Hồ Chí Minh kiăng kơ ĕp brơi bruă mă hăng hơmâo prăk apah lu ƀiă mơng hơdôm sang măi; pơtô pơblang , pơtrut pơsur hăng prap lui ba 4.200 čô mơnuih pơwŏt glăi mă bruă; Anom bruă ĕp brơi bruă mă tơring čar Gialai ăt hơmâo lĕ wŏt hyu lăi pơthâo bruă mă ƀơi hơdôm tơring glông, plơi prong, ĕp brơi bruă mă kơ hơdôm rơtuh čô mơnuih. Ră anai, tơring čar glăk amăng bơyan pĕ pơhrui kơphê hăng kơsu, yua anun hơdôm rơbâo čô mơnuih djuai ania ƀiă ăt amra hơmâo bruă mă amăng bơyan anai.

Siu Đoan: Pơblang