VOV4.Jarai - Amăng lơ 24/6, rơgao mă ia khak pơčrang lăng ƀơi kual dô̆ čơlah hơbit, Anom wai lăng tơlơi duam ruă tơring čar Gialai čih hmâo dong 2 čô mơnuih ƀă kơman pơčrang lăng ta sa hăng Sars-CoV-2, dô̆ hrom sa bôh plơi Yon Tok, să Ia Glai, tơring glông Čư̆ Sê. Dua čô mơnuih anai glăi mơng Bình Dương hrom hăng pô ruă 13486. Pơčrang lăng tal sa amăng lơ 21/6 ƀuh ƀă kơman klin Sars-CoV-2; pơčrang lăng tal 2 amăng lơ 24/6 ăt ƀuh ƀă kơman  Sars-CoV-2 mơn. Ră anai tơlơi suaih pral mơng 2 čô mơnuih anai hơđong mơn, ƀu hmâo pơtuk, pơ-iă drơi hăng glăk hmâo arăng krăp lăng tui. Bơdjơ̆ nao 2 čô mơnuih ƀă kơman anai, hơdôm bôh ƀirô apăn bruă tơring čar Gialai hmâo mă laih ia khak pơčrang lăng 6 cô mơnuih F1 ƀơi hơdôm bôh tơring glông Čư̆ Sê, Phú Thiện hăng Krông Pa. Ră anai hơdôm ia khak mơng mơnuih ƀơi tơring glông Čư̆ Sê, tơring glông Phú Thiện anai ƀu ƀuh kơman ôh. Pơtrut kơtang pơgang pơgăn Covid-19, tơring čar Gialai ăt glăk tŭ mă hăng ngă tui mơn bruă dô̆ čơlah hơbit 449 čô mơnuih, amăng anun hmâo 400 čô mơnuih amăng lŏn ia hăng 49 čô mơnuih rai mơng dêh čar tač rơngiao./.

Siu H’ Prăk: Pô pơblang