VOV4.Jarai - Ƀơi Gialai, lu khul grŭp mơnuih hmâo hơdôm bruă mă sit nik kiăng gum djru tơlơi tơnap, glêh glar hăng khul glăi ƀơi anih phun pơgăn klin.

Kiăng gum tơngan hrom djru tơring čar Gialai amăng bruă pơgang, pơgăn klin Covid-19, Grŭp mơnuih gum djru Fly To Sky gum hrom hăng Khul pơlir hơbit Hlăk ai Việt Nam tơring čar Gialai pơphun Jơlan hơdră “Gum djru khăp păp – Gialai gum tơngan hrom pưh por yơr đuăi klin Covid-19” hăng hơdôm bôh pia klă hiam hloh kơ bruă gơgrong mơng ană mơnuih hăng ngă tui pran jua gum hrom hơbit amăng plơi pla. Grŭp gum djru dô̆ ƀơk brơi kơ Grŭp črâo bruă pơgang, pơgăn klin Covid-19 tơring čar Gialai hơdôm gơnam mă yua kah hăng bơnal gôm adung mơbah, nil pơgang ia čač, ia rao tơngan pơdjai kơman, măi pơkă pơ-iă drơi jăn hăng hơdôm tơlơi kiăng yua hloh dong. Ayong Lê Văn Phúc – Khua Grŭp gum djru lăi pơthâo:

“Hăng sa čô mơnuih dêh čar Việt Nam lĕ sa čô ană bă mơng lŏn drŏn Gialai, kâo ăt kah hăng ƀing gơyut amăng grŭp gum djru dô̆ bơngot biă. Amăng 4 tal klin Covid-19 ngă, grŭp leng kơ hmâo hơdôm bruă pioh gum djru pơgang, pơgăn klin hăng truh ră anai abih bang nua gum djru hmâo 5 klai prăk laih. Hăng čang rơmang lĕ djru hơdôm khul grŭp ngă bruă, ăt kah hăng mơnuih ƀôn sang tơnap tap ƀơi tơring čar, djru ba lom bưp tơlơi tơnap kiăng gum tơngan hrom pưh por yơr đuăi klin Covid-19”.

Ƀing mơnuih thâo khăp păp djru bruă pơgang, pơgăn klin ƀơi Gialai

Bơ̆ ayong Phạm Thăng Bằng – Khua sa anom pla bơnga hơtai rơman ƀơi plơi prong Pleiku hmâo gum hrom hăng ƀing gŏp amăng anom “Bơnga hơtai rơman Gialai” ƀơk brơi 295 klăk prăk hăng 100 kơthung mì tôm truh Grŭp črâo ba bruă pơgang, pơgăn klin Covid-19 tơring čar Gialai. Ayong Phạm Thăng Bằng, brơi thâo:

 “Kâo čang rơmang hơdôm bôh ƀirô jơnum min gơnong bruă hăng mơnuih ƀôn sang gum hrom sa jua, tơma sa pran, ngă tui tơlơi črâo ba mơng gưl dlông kiăng ƀing ta dưi pơgăn klin, ngă giong tơlơi čang rơmang mơng abih bang mơnuih ƀôn sang lĕ pơđut klin ruă jai tañ jai klă hloh”.

Hơdôm gơnam kiăng yua mơng ƀing mơnuih thâo tơngia dưi ba nao pơ̆ kual dô̆ čơlah

Ăt hăng pran jua “gum djru nao rai tơdruă” mơn, hơdôm hrơi rơgao, lu khul grŭp mơnuih gum djru hmâo gum pơčruh lu gơnam tam mă yua gah ia jrao kah hăng bơnal gôm adung mơbah, ia pơdjai kơman, hăng lu añăm pơtăm, hơbơi pơtơi, bôh troh djop mơta kiăng djru brơi ƀơi anih pơgăn klin glăk hrơi mlăm pơgăn klin. Tui hăng Jơnum min djop djuai ania mơnuih mơnam dêh čar Việt Nam tơring čar Gialai, tơdơi rơbêh kơ 3 blan pơphun, anom hmâo tŭ mă prăk hăng gơnam tam mơng 345 khul grŭp, mơnuih djru bruă pơgang, pơgăn klin Covid-19 tơring čar Gialai, hăng abih bang nua ñu giăm truh kơ 22 klai prăk. Yă Phạm Thị Lan – Kơ-iăng Khua Jơnum min djop djuai ania mơnuih mơnam dêh čar Việt Nam tơring čar Gialai brơi thâo:

 “Ƀing gơmơi hmâo pơphun Tơlơi iâu pơthưr tơlơi gum sa pran, tơma sa jua mơng hơdôm khul grŭp, mơnuih, hơdôm ƀirô, anom bruă, anom bơwih ƀong anăp nao djru bruă pơgang pơgăn klin Covid-19. Ƀing gơmơi amra mă yua ngăn rơnoh djru anai kiăng hmao djru kơ hơdôm bôh anom dô̆ čơlah mơng khul ling tơhan tơring čar hăng hơdôm bôh anom bruă ia jrao, hrom hăng anun ăt djru mơn neh wa mơnuih ƀôn sang amăng kual klin ngă hơkrŭ pơsir tơlơi tơnap, hơđong tơlơi hơdip mơda. Čang rơmang lĕ, hăng tơlơi gum hrom hơbit tơma sa jua thơ ƀing ta amra pơsit pran gum hrom kiăng pơtrut kơdun klin ruă”./.

          Hoàng Quy: Pô čih – Siu H’ Prăk: Pô pơblang