VOV4.Jarai -  Tơring glông Đak Đoa, tơring čar Gialai prong rơbêh kơ 990 km kơ rê, hăng 111 bôh plơi, raih ataih ƀơi 17 bôh să, tơring kual. Lŏn prong, mơnuih ƀôn sang dô̆ hui, samơ̆ gơnang kơ mă yua klă Zalo, facebook bruă lăi pơhing ƀơi plơi pla hluh gah hăng ba glăi bôh tơhnal prong. Nguyễn Thảo, pô hyu mă tơlơi pơhing phrâo Gong phun jua pơhiăp dêh čar Việt Nam dô̆ mă bruă ƀơi kual Dăp Kơdư hmâo tơlơi čih lăi nao:

Djă ƀơi tơngan telephone rơnuk anai, ayong Phạm Công Tùng, mơnuih ƀôn sang plơi Tân Lập, să Trang, tơring glông Đăk Đoa, tơring čar Gialai pok grŭp Zalo mơng plơi kiăng lăng tơlơi pơhing lăi kơ klin Covid-19. Ayong Tùng brơi thâo, rim hrơi, grŭp črâo bruă pơgang, pơgăn klin mơng să mơ-ĭt 2 tơlơi lăi pơthâo lĕ lăng tơlơi pơhing lăi nao kơ klin ƀơi tơring čar Gialai hăng tơlơi pơphing hơdôm tơring čar, ƀôn prong hmâo klin. Lu tơlơi pơhing dưi lăi nao hăng gru rŭp, anun djop mơnuih amuñ amĕ thâo ană bă pô nao hrăm nao mă bruă pơwot glăi mơng hơpă lĕ khom dô̆ čơlah hơbit, ƀudah kơnong kơ lăi pơthâo hăng krăp lăng mă pô tơlơi suaih pral ƀơi sang. Ăt hluai tui grŭp Zalo anai mơn, mơnuih ƀôn sang amăng plơi ăt djru mơn grŭp črâo bruă lăng tui mơnuih ƀôn sang hmâo ngă tui tơpă mơn hơdôm tơlơi pơkă kơ pơgang, pơgăn klin:

 “Bruă lăng tui mơnuih mơng kual klin glăi ƀudah mơnuih abih hrơi dô̆ čơlah hơbit pơwot glăi pơ̆ sang pô, ană bă nao hrăm, nao mă bruă glăi lĕ ƀing gơmơi ăt lăng tui mơn. Ană bă nao hrăm glăi lĕ mơnuih ƀôn sang hmâo ngă juăt, lăi pơthâo amăng telephone, lăi pơthâo amăng plăng hrom, lăi pơthâo glăi Sang ia jrao, Jơnum min mơnuih ƀôn sang să kiăng rơkâo gơñu lăi pơthâo kiăng mơnuih ƀôn sang huăi bral bơngat”.

Kông ang tơring glông Đăk Đoa pơtô brơi mơnuih ƀôn sang hơduah ĕp hơdôm grŭp Zalo kiăng thâo tơlơi pơhing kơ klin Covid-19

Ơi En – Khua Jơnum min mơnuih ƀôn sang, Khua grŭp črâo ba bruă pơgang, pơgăn klin Covid-19 să Trang, tơring glông Đăk Đoa brơi thâo, ră anai, 5 bôh plơi amăng să leng kơ hmâo grŭp Zalo. Rim grŭp leng kơ hmâo mơng 120 truh 150 čô mơnuih gum hrom lĕ pơ ala mơng hơdôm bôh sang anô̆ mơnuih ƀôn sang. Grŭp črâo bruă pơgang, pơgăn klin mơng să pơpha mơnuih amăng grŭp gum hrom hơdôm grŭp kiăng gal lăi glăi mơtăm hơdôm tơlơi akă rơđah mơng mơnuih ƀôn sang. Djơ̆ anô̆ ñu, anun lĕ hơdôm tơlơi tơña kơ phiăn lăi pơthâo gah ia jrao, djơ̆ anô̆ ñu lĕ hơdôm bruă khom ngă lom dô̆ čơlah mă pô ƀơi sang, djơ̆ anô̆ ñu tơña anăn anih dô̆, bruă mă mơng tơring čar pơkon glăi pơ̆ plơi pla pô hmâo lăi pơthâo gah ia jrao hă akă.

“Gơnang kơ hơdôm grŭp Zalo anai amăng hơdôm hrơi rơgao, să hmâo tŭ jum 143 čô mơnuih mơng anih anom pơkŏn nao mă bruă. Amăng anun, sa dua mơnuih ngă tui dô̆ čơlah hơbit, sa dua anih dô̆ čơlah ƀơi sang. Mơnuih ƀôn sang hmâo tô nao rai Zalo lĕ lăng hră čih anăn hơdôm anih anom hmâo klin, arăng thâo, arăng gơgrong hlâo. Tơdah ƀôn prong Hồ Chí Minh ngă tui Tơlơi črâo ba mrô 16 arăng gơgrong hlâo nao pơ̆ sang ia jrao”.

Thiếu tá Khuất Đức Hiệu – Khua Kông ang să Trang brơi thâo, ăt gơnang kơ bôh tơhnal gum hrom mơng hơdôm grŭp Zalo, mơng blan 3 truh blan 6/2021, anom hmâo ngă giong tơhnal pơkă pha brơi 3.600 pok hră căn cước công dân mơ̆ ăt pơhlôm mơn tơlơi pơkă pơgang, pơgăn klin. Kông ang să Trang lăi pơhing kơ klin, anih anom ngă hră căn cước công dân. Mơnuih ƀôn sang kơnong kơ thâo anih pơsit hră kak 2 wot lĕ lom anun mrô hlâo adơi hăng lom ngă hră. Yua anun, mơnuih ngă hră ƀu dô̆ tơguan, hră pơ-ar ăt hluh gah mơn hăng pơhlôm dô̆ ataih nao rai, ƀu tum pơƀŭt hơbit rơgao kơ 20 čô mơnuih ƀơi anih ngă hră căn cước công dân:

“Mă mrô giong, kâo jak iâu arăng gum hrom plăng Zalo mơng pô hlao, jak iâu neh wa glăi pơ̆ sang glăi truh pơ̆ sang arăng bơjak nao rai, rŏng lăi pơthâo mă kơ tơdruă. Năng ai ñu 30 mơnit lăi pơthâo sa wot lĕ ơ neh wa, ră anai truh mrô 59 lĕ hơdôm neh wa mrô 69 lĕ arăng prăp lui hlâo, arăng nao. Lăi pơthâo nao rai tơlơi pơhing amăng plăng Zalo anai, pơjing pran jua mơ-ak kơ mơnuih ƀôn sang hăng ƀu tum pơƀut lu mơnuih”.

Gơnang kơ mă yua ba glăi bôh tơhnal glông facebook, Zalo anun kông ang tơring glông Đăk Đoa ngă giong tơhnal pơkă kơ căn cước công dân, mơ̆ ăt pơhlôm mơn pơgang, pơgăn klin

Tui hăng mrô yap mơng tơring glông Đak Đoa, ră anai tơring glông hmâo rơbêh kơ 40 rơbâo mrô telephone mă yua 3G, 4G. Pơsit anai lĕ sa glông lăi pơhing ba glăi bôh tơhnal, tañ hăng prăk mă yua ƀu lu, mơng blan 3/2020, Jơnum min mơnuih ƀôn sang tơring glông Đăk Đoa hmâo jao kơ Kông ang tơring glông pơdŏng hrom hrom hơdôm fanpage amăng facebook hăng glông pơhing Zalo official Account kơ Jơnum min mơnuih ƀôn sang hăng kông ang mơng 17 bôh să, tơring kual amăng đơ đam tơring glông. Ƀơi anai, mơnuih ƀôn sang amra lăng tơlơi pơhing kơ bơwih ƀong – mơnuih mơnam ƀơi anai, lăng tui rơnoh pơsir hră pơ-ar hăng tơlơi pơhing klin ruă. Ƀơi gưl să, anom ăt djru mơn hơdôm bôh plơi pơdŏng hơdôm grŭp Zalo kiăng gum hrom hăng mơnuih ƀôn sang kơ bruă pơgang, pơgăn klin Covid-19.

Tơlơi pha ra lĕ hơdôm glông pôr pơhing mơng gưl tơring glông, truh să, trun pơ̆ plơi pla leng kơ dưi tô nao rai sôh. Yua anun, kơnong kơ kiăng mut hrom grŭp anai, mơnuih ƀôn sang dưi lăi pơthâo nao rai hăng telephone mơtăm hăng Khua grŭp črâo bruă pơgang, pơgăn klin ƀudah khua kông ang gưl să, tơring glông tơdah kiăng. Đại uý Đàm Mai Minh Tuấn, Kơ-iăng khua Grŭp pơdŏng bruă pơgang tơlơi rơnuk rơnua plơi pla lŏn ia, Kông ang tơring glông Đăk Đoa brơi thâo, bruă mă anun hơdôm grŭp online hmâo djru hrŏ trun đut hlah laih prăk mă yua, hrom hăng anun ba glăi bôh tơhnal bruă lăi pơhing ăt dưi pơđĭ tui rơđah rơđông mơn:

“Tơdơi kơ pok pơhai grŭp Zalo hăng fanpage, mrô prăp lui hơdôm hră pơ-ar ƀiă mông hloh. Mrô tơdăm ngek dra muai mă yua facebook lu hloh kơ mơnuih tha, mrô mơnuih ta thâo klă hloh, pơhlôm hloh lu biă. Lom mơnuih apăn bruă nao pơ̆ plơi, pơkă gru rŭp, tơlơi čih, video, măi mok djă ba gun hrun biă. Samơ̆ amăng facebook, tañ rơguăt biă, kơnong kơ mơ-ĭt tơlơi pơhing 3 truh kơ 4 giây lĕ djop mơnuih thâo abih laih”.

Bruă mă yua măi mok, telephone rơnuk anai hmâo lu laih ƀơi tơring čar Gialai, yap wot hơdôm anih anom kual ataih, asuek; bruă mơnuih ƀôn sang mă yua hơdôm plăng facebook kiăng bơkơtuai nao rai, gum hrom ăt lu mơn. Mă yua plăng facebook amăng wai lăng git gai, hơdôm ƀirô, anom bruă – grŭp, hơdôm bôh plơi, să ƀơi Đăk Đoa lăi ha jăn, Gialai lăi hrom hmâo hơkrŭ pơsir lăp yap ba biă tơlơi tơnap yua kơ ataih yaih, djru ngă brơi mơnuih ƀôn sang giăm nao rai hloh hăng gong gai hơdôm gưl. Amăng tơlơi dô̆ čơlah mơnuih mơnam pơgang pơgăn klin Covid-19, hơdôm gru rŭp mă yua ăt jai brơi ƀuh bôh tơhnal rơđah hloh, djru ngă hơdư̆ klin ruă, pơhlôm djă pioh bruă bơwih ƀong huă sĭ mơdrô./.

            Nguyễn Thảo (VOVTN): Pô čih – Siu H’ Prăk: Pô pơblang