VOV4.Jarai- Rơbêh 34 ektar glai rưng ƀơi Tiểu khu 1060 yua kơ Jơnum min mơnuih ƀon sang să H’Bông, tơring glông Čư̆ Sê, tơring čar Gialai wai lăng ƀuh arăng phă, čuk rơmet hĭ thơ thă dong mơng blan 3/2021 truh akŏ blan 9/2021. Truh kơ 34 ektar ƀuh arăng trơ̆i rơmet hĭ abih kyâo pơtâo, 23 ektar amăng anun hơmâo pla kyâo bạch đàn, hơdôm anom bruă bơdjơ̆ nao amăng tơring glông kah mơng ĕp ƀuh, pơgăn hĭ. Bruă sua mă lŏn glai rưng anai brơi ƀuh ƀing ngă soh ƀu hŭi ôh lơ̆m phă pơrai glai kyâo, tơlơi anai ăt brơi ƀuh bruă wai pơgang glai amăng ƀon lan aka ƀu kjăp lơi.

Bruă ngă soh ƀuh ƀơi hơdôm kual 1,2 hăng 4, Tiểu khu 1065, lŏn glai yua kơ Jơnum min mơnuih ƀon sang să H’Bông, tơring glông Čư̆ Sê wai lăng. Ƀơi lŏn glai arăng phă, ƀong gơñu ăt păng mă anih dŏ hăng ƀat, ƀơi anai hơmâo djop gơnam yua rĭm hrơi, laih dong ba măi, rơdêh čuk pioh rơmet agaih, pla phrâo rơbêh 23,5 ektar kyâo bạch đàn, 11 ektar dŏ glăi rơmet agaih hĭ kyâo pơtâo. Yă Rmah H’Bé Nét - Khua Jơnum min mơnuih ƀon sang tơring glông Čư̆ Sê, Gialai brơi thâo, djop gơnong bruă amăng tơring glông pơsit, bruă sua mă lŏn glai anai ƀuh amăng ha mơkrah thun laih, dong mơng blan 3 truh blan 9/2021, anai lĕ hrơi blan djop anom bruă glăk đing nao pơgang klin:

“Thun 2021, tơring glông Čư̆ Sê hơmâo klin Covid-19. Să H’Bông hơmâo 1 ƀut plơi guang dar, yua anun hơdôm anom bruă glăk đing nao pơgang klin, mơnuih apăn bruă aset, wai lăng aka ƀu kjăp. Yua anun ba truh tơlơi anai, ƀing gơmơi ăt bơngŏt mơn”.

Arăng mut nao pơdong tông păng mă hăng ƀat, ba nao măi mok trơ̆i, čuk rơmet pioh pla phun ƀạch đàn, đơ đam lŏn glai sua mă lĕ 34,6 ektar

Hrŏm hăng bruă anai, ơi Bùi Văn Cường - Kơ-iăng Khua Jơnum min mơnuih ƀon sang să H’Bông, tơring glông Čư̆ Sê brơi thâo ăt hơmâo tơlơi ngă soh pơkŏn dong amăng bruă jao glai. Ñu brơi thâo, kơplah wah thun 2019, lơ̆m Khul wai lăng glai Ayun Pa pơdơi bruă, laih anun jao glăi rơbêh 3.800 ektar glai, amăng anun hơmâo rơbêh 2.100 ektar lŏn glai pioh wai lăng kjăp samơ̆ yua ƀu hơmâo rơdêh hăng mơnuih apăn bruă jao wai lăng. Lŏn glai ƀơi anai lĕ glai ha guai hăng 2 tơring glông Phú Thiện hăng Mang Yang, tơlơi anai ngă kơ bruă wai pơgang glai bưp tơnap tap.

“Tơdơi kơ să H’Bông tŭ mă lŏn glai anai bưp lu tơnap tap lơ̆m khŏm găn nao rai ia krông, ƀudah găn nao rai 2 boh tơring glông Phú Thiện, Ia Pa, găn nao rai lĕ giăm 100 km, Jơnum min mơnuih ƀon sang să ƀu hơmâo tơhan wai lăng kar hăng tơhan wai lăng glai rưng”.

Ƀing ngă soh  pla phrâo 23,5 ektar amăng kual lŏn glai

Bơdjơ̆ nao bruă phă glai kyâo anai, ơi Thái Thượng Hải, Anom bruă wai lăng glai rưng tơring glông Čư̆ Sê brơi thâo, anom bruă glăk pel ĕp kiăng ngă rơđah bruă phă glai kyâo anai:

“Anai lĕ bruă ngă soh kơtang iă mă, yua anun anom bruă wai lăng glai rưng hrŏm hăng gơnong bruă bơdjơ̆ nao kah hăng anom bruă tơhan pôlih pel ĕp, Anom bruă pơsir kơđi tơlơi nao lăng tơl anih. Blung hlâo hơmâo iâu pơƀut glăi ƀing ngă soh, tơña kơđi ƀing gơñu. Hăng lŏn glai arăng phă, čuk thơ thă, biă mă ñu glai pioh lui, Anom bruă wai lăng glai rưng hơmâo pel ĕp khut khăt kiăng kơ ĕp ƀuh mơnuih ngă soh hăng pơsir kơđi djơ̆ hăng tơlơi phiăn”.

Hrŏm hăng bruă git gai pel ĕp khut khăt, ngă rơđah bruă ngă soh, Jơnum min mơnuih ƀon sang tơring tơring glông Čư̆ Sê ăt hơmâo lăi pơthâo bruă anai nao Jơnum min mơnuih ƀon sang tơring čar Gialai, gơnong bruă ngă hmua hăng pơđĭ kyar ƀon lan tơring čar, rơkâo jao lŏn glai ƀơi ƀon lan brơi hơdôm anom bruă bơdjơ̆ nao kiăng kơ bruă wai lăng kjăp ƀiă dong./.

Siu Đoan: Pơblang