VOV4.Jarai -  Amăng hră lăi pơthâo čơtlăm lơ 8/9, Grŭp črâo bruă pơgang, pơgăn klin Covid-19 tơring čar Gialai lăi pơhing, mơng 12 mông krah mlăm lơ 9/9, brơi plơi prong Pleiku pơdơi dô̆ čơlah mơnuih mơnam tui Tơlơi črâo ba mrô 16 mơng Khua dêh čar, hrom hăng anun iâu pơthưr hơdôm anih anom amăng tơring čar pơdŏng jơlan gah pơđĭ kyar bơwih ƀong – mơnuih mơnam amăng “tơlơi hơđong phrâo". Grŭp črâo bruă pơgang, pơgăn klin Covid-19 tơring čar Gialai rơkâo brơi pơdơi jăng jai dong hơdôm bruă mă ƀu kiăng đơi, sang čơ pơdŏng mă, rai daih ƀơi jơlan glông; mơnuih ƀôn sang ƀu tum pơƀut lu rơgao kơ 10 čô mơnuih ƀơi anih mă bruă, sang hră, sang ia jrao, anih hmâo lu mơnuih jưh, tum pơƀut. Anih sĭ gơnam ƀong huă dưi pok sĭ mơdrô glăi, samơ̆ kơnong kơ dưi sĭ ba glăi pơ̆ sang. Rơngiao kơ anun, tơring čar Gialai ăt rơkâo mơn plơi prong Pleiku guang dar kơjăp dong hăng hơdôm anih anom bơdjơ̆ nao hơdôm mơnuih ruă phrâo thâo amăng hơdôm hrơi jê̆ hăng anai; tañ hyu huĕt ĕp, guang dar kual, guang dar tui ƀut mơnuih ƀôn sang dô̆. Hăng hơdôm bôh tơring glông, plơi prong dô̆ glăi, tơring čar Gialai rơkâo pơdŏng jơlan gah pơgang kual pơhlôm, pok pơhai hơdôm bruă bơwih ƀong mơnuih mơnam tui jơlan gah “tơlơi hơđong phrâo”./.

Siu H’ Prăk: Pô pơblang