VOV4.Jarai -  Kiăng pơhlôm bruă pơgang, pơgăn klin Covid-19, hăng djă pioh hơdôm bruă bơwih ƀong, hơdôm hrơi rơgao, tơring čar Gialai hmâo laih lu jơlan gah pơhlôm bruă dŭ pơgiăng gơnam tam, biă ñu gơnam sĭ kơ dêh čar tač rơngiao găn bah amăng guai lŏn ia Lệ Thanh, gah tơring glông Đức Cơ. Mơng akô̆ thun truh ră anai, bruă sĭ gơnam găn rơgao bah amăng guai dêh čar Lệ Thanh (tơring glông Đức Cơ, tơring čar Gialai) dưi pơhlôm hluh gah, hmâo prăk pơhrui glăi năng ai ñu 90 klăk dolar Mi, đĭ 78% bơhmu hăng thun 2020.

Amăng anun, bruă blơi mut (biă ñu gơnam mă mơng đang hmua) hmâo 62 klăk dolar Mi, đĭ 2,5 wot. Ơi Hoàng Lương Quang – Khua Anom wai lăng bruă nao rai hăng dêh čar tač rơngiao Bah amăng guai lŏn ia Lệ Thanh – Anom wai lăng bruă rô nao rai hăng dêh čar tač rơngiao Gialai – Kontum brơi thâo, khul mơnuih mă bruă gah anom hmâo gum hrom kơjăp laih hăng khul ia jrao, ling tơhan pơgang guai lŏn ia ngă tui tơpă hơdôm tơlơi pơkă pơgang, pơgăn klin Covid-19 ƀơi kual dŭ pơgiăng nao rai gơnam tam./.

Siu H’ Prăk: Pô pơblang