VOV4.Jarai - Hơdôm rơtuh čô nai ia jrao, kông ang hăng ling tơhan gah khul git gai pơgang klin Covid-19 tơring čar Gialai hơmâo ječ ameč pơčlah hơdôm rơbâo čô mơnuih glăi mơng kual hơmâo klin lĕ ƀôn prong Hồ Chí Minh, tơdơi kơ ƀôn prong anao pơčlah mơnuih mơnam. bruă pơčlah mơnuih pơphun mơng 2 mông mơguah lơ 31/5. Tui anun Khul git gai pơgang klin Covid-19 tơring čar Gialai rơkâo rơbêh 1.500 čô mơnuih amăng rơbêh 53 boh rơdêh hăng 116 čô mơnuih đĭ rơdêh por mơng ƀôn prong Hồ Chí Minh glăi pơ Pleiku nao phaih gah ia jrao.

Tơdơi anun pơkah mă 667 čô mơnuih pơčrang lăng hŭi kơ ƀă klin Covid-19, 133 čô mơnuih ba nao pơčlah pơƀut ƀơi tơring glông Đức Cơ. Ƀing mơnuih dŏ glăi pơčlah mă pô pơ sang, hơmâo gong gai ƀon lan kiăo tui lăng. Laih dong bruă wai lăng tuai găn nao rai ƀơi tơdron rơdêh por, tơdron rơdêh pơgiăng hyu tuai amăng tơring čar Gialai khŏm hmư̆ tơlơi pơhing na nao, laih dong dưm camera kiăo tui lăng rơdêh glăi mơng ƀôn prong Hồ Chí Minh. Tơring čar hơmâo pơdong 4 anih dŏ gak kơtuai tui jơlan mrô 14, 19 hăng 25 mut nao tơring čar mơng 12 mông mlăm mơguah lơ 31/5, wai lăng hăng kiăo tui ĕp hơdôm rơdêh glăi mơng ƀôn prong Hồ Chí Minh.

Siu Đoan: Pơblang