VOV4.Jarai - Tal pơplông thun anai đơ đam tơring čar Gialai hơmâo rơbêh 14.000 čô čơđai čih anăn nao pơplông pơ 39 boh sang hră pơphun sit nik hăng 17 boh sang hră prap lui ƀơi 17 boh tơring glông, plơi prong, hăng 616 anih pơplông. Him lăng amra hơmâo 1.282 čô mơnuih apăn bruă wai lăng, 20 mơnuih apăn bruă krăo lăng hăng giăm 500 čô mơnuih djru brơi pơkŏn hơmâo ƀing kông ang, nai ia jrao, ƀing tơhan pơkŏn. Ơi Nguyễn Văn Long, Kơ-iăng khua gơnong bruă pơtô hrăm tơring čar Gialai brơi thâo, gơnong bruă pơtô hrăm tơring čar Gialai hơmâo prap lui akŏ bruă pơplông abih anih 12 hăng 4 mrô kiăng kơ pơgang rah klin Covid-19. Mơng anai truh hrơi pơphun pơplông, djop Khul pơphun pơplông amăng đơ đam tơring čar Gialai amra prap lui hŭi hơmâo tơlơi truh sat ƀu hmao thâo laih anun pơsir hmao tlôn kiăng tal pơplông pơphun hơđong, tơpă sit, ƀing čơđai pơplông lu puang hloh amăng hrơi blan klin Covid-19 glăk ngă tơnap tap ră anai.

Siu Đoan: Pơblang