VOV4.Jarai -  Tui hăng tơlơi pơkă mrô 596 mơng Jơnum min mơnuih ƀôn sang tơring čar Gialai, mơng lơ 20/9 truh ră anai, giăm hmâo 14 rơbâo čô mơnuih ƀôn sang bưp tơnap yua bơdjơ̆ nao mơng klin Covid-19 dưi čơkă mă braih gum djru mơng Kơnuk kơna. Đăk Đoa lĕ sa amăng hơdôm tơring glông blung a mơng tơring čar Gialai dưi pha brơi kiăng djru mơnuih ƀôn sang glăk bưp tơnap yua kơ klin Covid-19, mơng lơ 20/9. Truh ră anai, Anom djă pioh braih Kơnuk kơna kual Pơngŏ Dăp Kơdư hmâo ba nao laih braih kơ 8 bôh să, tơring kual mơng tơring glông hăng bruă pha braih glăk dưi pơphun. Kiăng braih djru hmao truh hăng djơ̆ mơnuih, hrom hăng anun pơhlôm pơgang klin, hơdôm bôh plơi pla să hmâo dưm dăp khul mơnuih, pơpha mông pha braih djơ̆, hrom hăng anun lăi pơthâo rơđah truh rim sang anô̆ mơnuih ƀôn sang. Tui hăng tơlơi pơpha mơng Kơnuk kơna, amăng tal anai Gialai dưi pha brơi rơbêh kơ 200 tơn braih, kiăng djru brơi rơbêh kơ 3.300 bôh sang anô̆ hăng giăm truh 14 rơbâo čô mơnuih ƀơi 10 bôh tơring glông. Rim čô mơnuih dưi djru 15 kg braih amăng sa blan./.

Siu H’ Prăk: Pô pơblang