VOV4.Jarai - Lơ 29/6, Khul pơ ala mơnuih ƀôn sang tơring čar Gialai tal 12 (rơwang bruă 2021-2026) hmâo ruah laih ƀing khua mua phun gah Khul pơ ala mơnuih ƀôn sang tơring čar. Kiăo tui anun, ƀing khua pơ ala Khul pơ ala mơnuih ƀôn sang tơring čar tal 12 (rơwang bruă 2021-2026) hmâo plĕ hră ruah ƀing khua mua mơng Khul pơ ala mơnuih ƀôn sang tơring čar, amăng anun hmâo Khua Khul pơ ala mơnuih ƀôn sang tơring čar, Kơ-iăng Khua Khul pơ ala mơnuih ƀôn sang tơring čar, Khua hăng Kơ-iăng Khua Grŭp hơdôm Grŭp Khul pơ ala mơnuih ƀôn sang tơring čar Gialai.

Ơi Hồ Văn Niên dưi ruah ngă Khua Khul pơ ala mơnuih ƀôn sang tơring čar Gialai tal 12

Bôh tơhnal, hăng mrô 70/71 hră plĕ ruah, ơi Hồ Văn Niên – Ding kơna Grŭp mă bruă Ping gah dêh čar ta, Khua git gai Ping gah tơring čar, Khua Grŭp pơ ala mơnuih ƀôn sang tơring čar Gialai tal 15 dưi ruah ngă Khua Khul pơ ala mơnuih ƀôn sang tơring čar tal 12 (rơwang bruă 2021-2026). Ơi Võ Ngọc Thành – Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar Gialai rơwang bruă 2021-2026 dưi ruah ngă glăi Khua Jơnum min mơnuih ƀôn sang tơring čar Gialai rơwang bruă 2021-2026. Amăng 4 čô Kơ-iăng Khua Jơnum min mơnuih ƀôn sang tơring čar Gialai rơwang bruă 2021-2026, hmâo ơi Đỗ Tiến Đông, ơi Kpă Thuyên hăng yă Nguyễn Thị Thanh Lịch ruah ngă glăi Kơ-iăng Khua. Kơ-iăng Khua phrâo Jơnum min mơnuih ƀôn sang tơring čar lĕ ơi Hồ Phước Thành (Khua hơđăp Gơnong bruă kơčăo bruă hăng tuh pơplai tơring čar Gialai)./.

Siu H’ Prăk: Pô pơblang