VOV4.Jarai - Mơmot  lơ 21/6, Anom wai lăng tơlơi duam ruă tơring čar Gialai lăi pơhing, anih anom phrâo čih pioh sa čô mơnuih ƀă kơman Covid-19 phrâo glăi mơng sa kual sang măi pơ̆ tơring čar Bình Dương. Rơđah biă ñu, pô đah rơkơi ƀă kơman Covid-19 tơkeng thun 2005 mă bruă ƀơi Sang bruă pơkra mì tôm ƀơi plơi prong Thủ Dầu 1, tơring čar Bình Dương. Pô anai dô̆ amăng kual sang apah pơ̆ phường Nghĩa Hội, plơi prong Tân Uyên, tơring čar Bình Dương hăng glăi pơ̆ plơi Yon Tok, să Ia Glai, tơring glông Čư̆ Sê amăng mơguah lơ 19/6. Čơtlăm hrơi anun mơn, pô anai nao pơ̆ Sang ia jrao să lăi pơthâo tơlơi suaih pral hăng mă ia khak pơčrang lăng yua kơ pơwot glăi mơng anih amra hmâo klin ngă. Ră anai, 24 čô mơnuih F1 mơng pô ƀă kơman anai dưi dô̆ čơlah tui tơlơi pơkă laih. Ră anai, pô ruă akă ƀuh pơtuk pơ-iă drơi ôh hăng glăk dưi dô̆ čơlah hơbit. Jơnum min mơnuih ƀôn sang tơring čar Gialai hmâo hră pơ-ar rơkâo hơdôm anih anom amăng tơring čar hruă kơjăp bruă wai lăng mơnuih glăi mơng anih klin ngă; kơtưn bruă hyu tir, wai lăng ƀơi hơdôm glông jơlan, jơlan mut amăng tơring čar./.  

Siu H’ Prăk: Pô pơblang