VOV4.Jarai - Tui hăng gơnong bruă sĭ mơdrô tơring čar Gialai, mơng akŏ thun truh ră anai, rơnoh sĭ mơdrô pơ tač rơngiao mơng tơring čar truh pơ 360 klăk đôlar Mi, dưm dưm 59% tui tơlơi pơkă amăng ha thun, đĭ 22,3 % pơhmu tui tơđar thun hlâo. Amăng anun, kơphê lĕ gơnam sĭ mơdrô yôm hloh, dưm dưm 57,5% rơnoh sĭ mơdrô pơ tač rơngiao. Sit biă ñu, amăng 7 blan laih rơgao, rơnoh sĭ mơdrô kơphê ƀơi Gialai truh pơ 138 rơbâo tơ̆n, dưm dưm 207 klăk đôlar Mi.

Pơhmu tui tơđar thun 2020, rơnoh sĭ mơdrô kơphê đĭ rơbêh 20% mrô tơ̆n hăng đĭ rơbêh 24% nua sĭ. Gơnong bruă sĭ mơdrô Gialai brơi thâo, amăng thun blan laih rơgao, djop anom bơwih ƀong sĭ mơdrô kơphê hơmâo hơdeč hmar pơjing kual pla kơphê hăng rơbêh 34 rơbâo ektar tui hơnong pơkă 4C, UTZ, Organic; hơmâo akŏ bruă, pơphun pơkra pơjing amăng thun blan hơmâo klin, pơkra klă kơdung gơnam sĭ mơdrô, gơnam hiam hơdjă, pơsit tong anih pơkra pơjing, anih pla; mă yua klă hơdôm tơlơi gal amăng sĭ mơdrô.

Siu Đoan: Pơblang