VOV4.Jarai - Hăng pran gir run “Pơgang klin kar hăng blah ayăt”, mơnuih ƀon sang hơdôm să giăm guai tơring čar Gialai kĭ tơlơi pơkôl hrŏm hăng Ping gah, gong gai ƀon lan kah hăng hơdôm anom bruă bơdjơ̆ nao pơgăn, lăi pơthâo bruă ba tơbiă hăng mut rai dêh čar ča čot kiăng pơgang hŭi klin Covid-19 lar hyu.

Klin Covid-19 ƀơi dêh čar ta glăk ngă tơnap tap, ƀu hmao thâo hăng ƀuh na nao mơnuih ƀă klin amăng hơdôm hrơi laih rơgao. Bơ ƀơi dêh čar ha guai lĕ dêh čar Kur, klin ăt lar hyu kơtang ƀơi hơdôm tơring čar, ƀôn prong. Yua anun, hơdôm blan laih rơgao, ling tơhan wai pơgang guai lŏn ia tơring čar Gialai gir run dŏ gak, wai lăng kjăp ƀơi guai lŏn ia kiăng kơ ngă tŭ yua ha amăng plĕ. Phrâo anai, Anom bruă git gai ling tơhan wai pơgang guai lŏn ia tơring Gialai hơmâo pơkiăo nao dong 48 čô mơnuih apăn bruă, ling tơhan nao mă bruă ƀơi guai lŏn ia kiăng kơ hrŏm hăng ling tơhan ƀơi guai lŏn ia pơphun hyu tir, wai lăng, ngă khut khăt kiăng pơgăn bruă ba hyu mơnuih găn nao rai ča čot hŭi kơ ngă klin lar hyu mơng guai lŏn ia.

Kiăng kơ jak iâu gum pơgôp mơnuih abih bang mơnuih ƀon sang amăng bruă pơgang klin Covid-1 hăng pơgăn mơnuih găn nao rai ča čot, mơng akŏ blan 5 laih rơgao, Khua apăn bruă Ping gah tơring čar Gialai hơmâo hră pơ-ar rơkâo djop gưl, gong gai, anom bruă, khul grup, biă mă ñu lĕ ƀơi guai lŏn ia bơdjơ̆ nao bruă mă gum hrŏm hăng puih tơhan wai pơgang guai lŏn ia pơphun klă bruă “Abih bang mơnuih ƀon sang djru pơgang klin Covid-19 hăng pơgăn mơnuih găn nao rai ča čot ƀơi guai lŏn ia”  kiăng kơ pơgăn mơnuih tơbiă hăng mut rai lŏn ia ča čot. Lăi nao kơ bruă anai, ơi Nguyễn Trọng Phú - Khua Jơnum min mơnuih ƀon sang să Ia Pnôn (tơring glông Đức Cơ) brơi thâo bruă pơtô pơblang glăk hơmâo să gum hrŏm pok pơhai hăng lu mơta. Să hơmâo pơkiăo nao tơhan wai lăng amăng plơi pla nao gak ƀơi hơdôm anih wai pơgang klin kiăng kơ hrŏm hăng ling tơhan wai pơgang guai hyu tir, wai kjăp ƀơi guai lŏn ia. Laih dong, să hơmâo gum hrŏm hăng Grup hyu mă bruă amăng Puih tơhan Ia Pnôn jak iâu djop sang anŏ amăng să kĭ tơlơi pơkôl ngă tui khut khăt bruă pơgang klin, anăm găn nao rai guai lŏn ia ča čot, ƀu hơdŏp, pơgang ba, gum djru, pơphun ba mơnuih tơbiă hăng mut rai lŏn ia ča čot; hmao tlôn lăi pơthâo, črâo ƀô̆ mơta ƀing hlơi ngă soh…

Ơi Nguyễn Trọng Phú - khua Jơnum min mơnuih ƀon sang să Ia Pnôn (tơring glông Đức Cơ) pơsit tong kơ pran gum hrŏm mơng mơnuih ƀon sang: “Mơnuih ƀon sang amăng să ngă tui khut khăt hơdôm tơlơi pơkă amăng pơgang klin. Sa, dua čô mơnuih dô̆ rơkơi bơnai gah dêh čar Kur samơ̆ lơ̆m klin lar hyu ăt ƀu găn nao rai čuă jơmư lơi. Mah amăng plơi, tơdah hơmâo mơnuih rơngiă, neh met wa kơnong iâu telephôn tơña bla mơ̆ ƀu găn nao rai ôh”.

Tui hăng jŭ yap mơng Anom bruă git gai ling tơhan wai pơgang guai lŏn ia tơring čar Gialai, truh ră anai, ƀơi 7 boh să amăng tơring čar hơmâo 7.763 amăng 12.024 boh sang anŏ kĭ tơlơi pơkôl ngă tui hơdră pơgang klin Covid-19 hăng pơgăn mơnuih mut rai ča čot ƀơi guai lŏn ia. Đại uý Nguyễn Viết Hoàn- Kơ-iăng khua git gai Puih kơđông tơhan Ia O (tơring glông Ia Grai) brơi thâo: Anom bruă hơmâo gum hrŏm hăng ƀon lan jak iâu giăm 50% mrô sang anŏ amăng să kĭ pơkôl. Amăng anun, 78 boh sang anŏ hơmâo đang hmua giăm guai lŏn ia, 265 boh sang anŏ hơmâo kơnung djuai adơi ayong ƀơi dêh čar Kur ăt lêng kơ kĭ tơlơi ƀuăn. Laih dong, anom bruă ăt pơkiăo nao tơhan hyu pơtô pơblang, rơkâo ƀing mơnuih mơgăt rơdêh pơgiăng hyu tuai, rơdêh buýt, ƀattô kĭ tơlơi ƀuăn ngă tui khut khăt hơdôm hơdră pơgang klin, anăm djru pơgiăng mơnuih găn nao rai ƀơi guai lŏn ia …Tơdơi kơ pơđok abih hơdôm boh tơhnal hăng kĭn amăng hră pơkôl, yă Rơ Mah Hlên (plơi Bi, să Ia O, tơring glông Ia Grai) brơi thâo “Klin ngă ngă hŭi rơhyưt. Yua anun, neh met wa lêng kơ ngă tui djơ̆ hơdôm hơdră pơgang klin kiăng kơ pơhlôm brơi tơlơi suaih pral kơ ta pô hăng mơnuih jum dar”.

Ƀơi să giăm guai lŏn ia Ia Mơr (tơring glông Čư̆ Prông), bruă pơtô pơblang tŏ tui pơtrut kơtang amăng loa pôr pơhing ƀơi hơdôm ƀut plơi pla amăng mơguah, tlam sui 30 mơnit sa wŏt. Grup hyu mă bruă ƀơi puih tơhan Ia Mơr hơmâo gum hrŏm hăng hơdôm gơnong bruă, anom bruă khul grup hyu pôr hăng loa na nao hăng dua tơlơi Yuăn hăng Jarai tơl plơi pla ala ƀon laih dong nao tơl đang hmua mơnuih ƀon sang. Ƀơi hơdôm anih wai pơgang klin, anom bruă bơdjơ̆ nao gir run hyu pơtô pơblang, črâo brơi mơnuih ƀon sang hơdôm hơdră pơgang klin.Tha plơi Ksor HBlâm (plơi Krông, să Ia Mơr) brơi thâo: “Loa pôr rĭm hrơi, ƀing apăn bruă bưp hlơi lêng kơ pơtă pơtăn. Ƀơƀrư̆, mut amăng tơlơi hơdip sit nik, pơplih tơlơi pơmĭn mơng neh met wa. 100% mrô sang anŏ amăng plơi, amăng să kĭ hră pơkôl ngă tui khut khăt hơdôm hơdră pơgang klin, anăm ngă soh, hơdŏp, djru brơi mơnuih găn nao rai lŏn ia. Abih bang mơnuih lêng kơ kiăng kơđiăng, tơdah ƀuh hlơi thơ ƀu thâo krăn lêng kơ lăi pơthâo brơi anom bruă bơdjơ̆ nao”.

Siu Đoan: Pơblang