VOV4.Jarai - Hrŏm hăng abih bang čơđai đơ đam dêh čar, lơ 7/7, rơbêh 19.800 čô čơđai amăng tơring čar Daklak mut nao pơplông abih anih 12 thun 2021 (tal 1). Mah anai lĕ sa amăng hơdôm tơring čar hơmâo klin Covid-19 samơ̆ yua kơ dưi pơgang kjăp yua anun ƀing čơđai, amĭ ama hăng ƀing mơnuih apăn bruă ăt hơđong pran jua, čang rơmang tal pơplông amra pơphun rơnuk rơnua, tơpă sit, djơ̆ tơlơi pơkă.

Ƀing čơđai hơđong anih dŏ hlâo kơ mông pơplông

Ƀơi hơdôm sang hră pơphun pơplông ƀơi Sang hră gưl tlâo Lăk, tơring kual Liên Sơn, tơring glông Lăk, lĕ anih hơmâo 2 čô mơnuih ƀă klin Covid-19, abih bang čơđai hơmâo arăng pơčrang lăng tañ hăng lêng kơ huăi ƀă klin, yua anun ƀing čơđai mut nao tal pơplông hơđong amăng pran jua. Abih bang čơđai lêng kơ ngă tui tơlơi pơkă anun lĕ truă akhăn gôm ƀô̆. Kiăng kơ pơhlôm brơi ataih tơdruă, plai ƀiă pơƀut lu čơđai, Khul pơphun pơkiăo nao lu mơnuih apăn bruă gah ia jrao lĕ 10 čô pơphun na nao bruă pơčrang lăng hyuh amăng drơi jăn, čroač ia jrao rao tơngan hlâo kơ ƀing čơđai mut nao anih pơplông.  Hrŏm hăng anun prap lui boh thâo amăng pơgang klin, ƀing čơđai ăt kơđiăng mơn amăng bruă pơgang klin amăng tal pơplông anai.

Siu Đoan: Pơblang